Cundut che la Austrie e vegni stimade tant che un Paîs cetant a pro dai fruts, cun zardins par zuiâ sparniçâts par ogni cjanton e implants turistics che a prudelin e a sveltissin il bon acet, dut câs al è cetant dificil, salacor impussibil, jentrâ intun ambient public cui fîs, cence meti in pericul la salût. Cun di fat, la Austrie e reste, in Europe, un Paîs – jenfri i pôcs – là che no àn mai metude adun une leç cu la improibizion di fumâ intai puescj là che si cjatisi insiemi. Par dî il vêr a son stadis fatis propuestis salacor ancje cun disposizions dal Guvier, ma chestis a stentin a cjapâ pît, par vie di une resistence sedi dai clients sedi dai gjestôrs, che a àn pôre che lis jentradis a vadin in mancul.
Al fâs ecezion il tentatîf, za fa agns, di inmaneâ intai bar e intai ristorants salis disseparadis par chei che no fumin (al somee un mont ledrôs!), ma chest al è stât fat obligatori dome par chei locâi che a àn avonde spazis e salis. Un zirut jenfri cualchi locâl de Carinzie al met daurman in biele mostre cemût che il mût italic di rangjâsi, burint fûr il miôr in cetantis ocasions, al vedi vût bon acet intal Carantan, ancje se lôr lu àn simpri vualmât di brut voli. Juste a dî che in plusôrs ristorants a rionzin il presit, se un al domande di podê mangjâ intune sale là che no si fume. In altris câs, il presit al è simpri chel, ma la sale no je cjalde. La soluzion plui sutile dut câs e je une altre: il locâl pai fumadôrs al sta disot e chel par chei che no fumin al sta disore, biel viert, come un puiûl, che si podedi viodi se chei disot a tegnin ben la cjiche in bocje. E po dopo, se no àn savoltât la fisiche, il fum no vaial simpri par sù? Si domandìn inalore se si trate dome di une mancjance di formazion o ben di intindiments ben precîs.
Cun dut achel alc si môf, e intes ultimis setemanis o vin podût viodi cetantis propuestis a pro di une sensibilizazion su cheste cuistion. Aromai a son ancje tancj ostîrs e gjestôrs di ristorants che a domandin une leç definitive, sapontâts des opinions che a vegnin pandudis di miedis e istituzions sanitariis su dut il teritori. Sul moment si stan cjapant sù lis firmis par fâ un referendum popolâr e rivâ a presentâ un dissen di leç in Parlament. Si pues capî che la strade e je lungje, ma al somee che la racuelte di firmis e stedi lant une vore ben, tant che no si à mai viodût in Austrie. Metipen che par une volte “Bella Italia” – chest al è un lôr sproc -, là che bielzà di cuindis agns o vin une improibizion plene al fum intai locâi, no sedi rivade a dâ il bon esempli!
Barbara Cinausero