Regulis plui griviis pai “disocupâts”

La confederazion austriache de economie (Österreichischer Wirtschaftsbund, ÖWB) e à presentât al guvier un document là che si domandin mudaments radicâi inte politiche dal marcjât dal lavôr, cun fin di sburtâ la ocupazion de int. Par cumò la situazion e je tant scandalose che, si ben che cuntune disocupazion des plui altis de storie austriache resinte, lis aziendis no rivin adore a cjatâ lavorents, ni sempliçs ni specializâts. Dut chest par vie che, tant che si lei tal document, “la veretât discomude e je che lavorâ nol conven simpri”! Par chel, come prime misure si propon di ridusi planc a planc il sussidi di disocupazion, che in mût normâl al ven dât al plui par dodis mês.
◆ Stant al segretari gjenerâl de confederazion, sul imprin si podarès dâ fûr fin al 70% dal ultin stipendi (fin cumò al ven dât il 55%), calant a grât a grât fin a rivâ intai ultins mês al massim al 40% o ancje di mancul. Cussì no varessin di vê consecuencis economichis pai belançs dal stât, che a restaressin sù par jù compagns. Dutun cun chel, si varès di pensâ a limitâ intal timp il “sussidi di emergjence”, che al ven dât daûr. Un pas par rindi plui tratîf di acetâ une ufierte di lavôr e je la scancelazion di podê vê altris redits: cumò come cumò un disocupât al pues vuadagnâ fin a 476 Euros al lort in plui dal sussidi di disocupazion. Par tantis categoriis di lavorents chest al è plui di chel che a cjaparessin lavorant! La confederazion e intint di meti man ancje ai recuisîts par zovâsi dai sussidis di disocupazion. In dì di vuê, i puescj indicâts dal colocament a àn di jessi dentri di une ore di viaç de abitazion: la propueste e intint di slungjâ chest timp a une ore e mieze e di gjavâlu dal dut pai disocupâts di lungje durade, ven a stâi che intal câs di disocupazion lungje si podaran colocâ su dut il teritori.
◆ Une novitât che la confederazion e varès voie di introdusi par ducj i ocupâts e je une “idoneitât parziâl al lavôr” intal câs di malatie: cumò un lavoradôr al è o dal dut idoni al lavôr o malât, ancje se par esempli cuntune cjavile stracuelade al podarès davuelzi un lavôr di ufici. Di ca indenant si varès di previodi une atestazion – di bande dal miedi – sul grât di inidoneitât par câs di malatie e/o infortuni e di consecuence une limitazion dal orari di lavôr o des incarghis daûr de gravitât. Il certificât inalore nol disarà nome “idoni/san” o “malât”, ma par esempli “idoni al 50%” o ben “nome lavôrs lizêrs”, e v.i.
◆ Stant a la confederazion, si tratarès di un document che al da i struments juscj par une riprese de economie a 360 grâts dopo de fin de pandemie, par vie che al met a disposizion i lavoradôrs che a coventin par chest intindiment. Chest document al varès ancje un profont valôr morâl, par vie che al mostre che il lavôr al rinfuarce e al da plui valôr al sens de vite daspò de lungje dade de pandemie che e à dât cetant martueri. ❚