AUSTRIE. L’aniversari dal plebissît: un event di riconciliazion tra todescs e slovens in Carinzie?

A son passâts 93 agns dal plebissît che al à delineât il confin tra la Carinzie e chel che al jere une volte il Ream dai Serps, Cravuats e Slovens. Il referendum, fat ai 10 di Otubar dal 1920, al è stât l’event plui impuartant di un pont di viste politic e storic pe Carinzie daspò la fin dal imperi asburgjic, ma al à ancje segnât il destin tragjic de minorance slovene. Cu la decision di vivi in Austrie, la cjadene des  Caravanchis e je deventade part dal confin tra i doi paîs fintremai ai nestris dîs, di consecuence i slovens de Carinzie si cjatin su la part austriache. In cuasi cent agns, la minorance si è ridusude in maniere drastiche (tal 1910 ancjemò 66 mil, vuê 13 mil personis) par vie de politiche di assimilazion agressive dal dopovuere.
Ogni an, l’ambient patriotic todesc al à celebrât chel aniversari tant che une sô grande “vitorie”. Cheste volte però dut al jere tant diferent a pet dai agns precedents, al à dit il vicepresident dal Consei Nazionâl dai slovens di Carinzie Nanti Olip. “La celebrazion e je stade libare dal spirt militarist. Il governadôr provinciâl al à pe prime volte fevelât in lenghe slovene”, cussì Olip. “Il futûr dal paîs si ricognòs cumò tant che une realtât bilengâl”.
Il slogan di chest an al jere “screâ il futûr, capî il passât” e la celebrazion e je stade fate ancje in lenghe slovene. Secont il governadôr Peter Kaiser, a vuelin rimarcâ dut ce che al è comun cuintri il “fals eroisim”. Tra i interpretis a jerin ancje students dal gjinasi sloven di Clanfurt che a àn cjantât cjançons in lenghe slovene e todescje.
Cence Haider, il leader de estreme diestre, e salacor il plui carismatic politic dal dopovuere, l’ambient nazionalistic al è colât intune fase di stagnazion. Daspò une schirie di scandui di coruzion dulà che a jerin coinvolzût soredut membris dal partît di Haider, lis elezions di Març a àn cambiade dal dut la forme politiche dal paîs. Cumò a guviernin i socialdemocratics, e l’ambient di diestre al à regjistrât un câl significatîf di sostegn.
Motîfs paralêi tra i plebissîts de Scozie e de Carinzie?
Di un troi paralêl interessant e scrîf la “Kleine Zeitung” e e met in confront il plebissît de Scozie e chel de Carinzie, events sucedûts a distance di 94 agns.
In ducj i doi i câs, il 55,18% dai scozês e il 59,04% dai carinzians a àn decidût di restâ tal stât li che a vivevin prime. Si somein ancje lis motivazions sedi in Carinzie tal lontan 1920 sedi in Scozie tal 2014: a jerin considerazions economichis che a àn determinât il vôt. “Lassâ une regjon economiche al varès – tant tal câs de Carinzie storiche come in Scozie – consecuencis negativis pe popolazion.” Cussì si spieghe cemût che soredut comunitâts agriculis dipendentis dal marcjât austriac a àn votât massime pe Austrie e cuintri il Stât SHS, debil dal pont di viste economic.
***
Mantignî i leams regjonâi
Un altri motîf determinant comun aes dôs nazions al jere la decision di lâ indenant cui leams regjonâi sociâi e economics viers un futûr organizât intun stât nazionâl. I separatiscj scozês, tant che la propagande dal gnûf stât meridionâl slâf a volevin vinci cun argoments nazionalistics. In ducj i doi i câs chel concet nol à vût sucès; ancje cirche la metât dai carinzians slovens a àn votât tal 1920 pe Austrie.
Salacor, al è ancje un fatôr psicologjic: sienziâts a àn dimostrât che lis personis a reagjissin in maniere negative a ideis pôc familiârs. La maiorance di noaltris e à miôr vê a ce fâ cun robis cognossudis, ancje se si scuen subî consecuencis negativis. Chest però – o pensi jo – al jere plui che decisîf pe zone agrarie conservadore intes monts de Carinzie. In fin, chê descrizion e somee un grum ae situazion in Friûl.❚
Janez Erat