AUSTRIE. Esplorâ la diversitât des lenghis

Slovens de Carinzie e cravuats dal Burgenland cun dôs organizazions_ Tra i rapresentants, a jerin presints ancje i slovens carinzians cun Nanti Olip e Marko Oraže dal Consei nazionâl dai slovens carinzians (Narodni svet koroških Slovencev  NSKS), la organizazion di minorance plui grande in Austrie, e Reginald Vospernik e Zalka Kuchling de Comunitât dai slovens de Carinzie (Skupnost koroških Slovencev in Slovenk).
“La diviersitât linguistiche e fâs part de Europe, naturalmentri. E pant la tradizion europeane e noaltris o volìn e o scugnìn tutelâle, ancje tal contest de globalizazion”, al à dit il president de FUEN Hans Heinrich Hansen.
Messaç dal president Vladimir Putin _ Presints ancje alts rapresentants de Comunitât europeane e dal guvier rus. Sul imprin, il sorestant de aministrazion presidenziâl, l’ex vice prin ministri e ex ministri de difese rus Sergei Ivanov al à consegnât lis peraulis di salût dal president rus Vladimir Putin.
“Al è interessant notâ che il guvier rus al cjape il nestri congrès tant sul seri. Cence dialic no podìn otignî risultâts sostignibii pes minorancis”, al à rimarcât il president Hans Heinrich Hansen.
Grant sucès pes organizazions di minorance austriachis_ La Union des minorancis (FUENS) e à acetât tant che gnûf membri a plen titul la comunitât di slovens carinzians (SKS www.skupnost.at). Pe vicepresidente de comunitât Zalka Kuchling, il congrès nol jere dome un event impuartant in tiermins di scambi di esperiencis tra lis minorancis etnichis, ma pe Comunitât slovene in Austrie, “finalmentri” si è vierte la puarte pe adesion te associazion paneuropeane.
Tal 2009 a vevin za fat la prime domande di adesion e, dopo une fase lungje di preparazion, a son stâts finalmentri acetâts. In plui dai slovens a son stâts acetât ancje i cravuats di Viene che però in Austrie ancjemò a spietin il ricognossiment uficiâl tant che minorance autoctone.
Intune interviste subit dopo il congrès di Mosche, la Kuchling e à visât di no dismenteâ il gran numar di minorancis che si cjatin a soreli jevât de Europe, che de plui part di lôr no vin nancje sintût il non.
190 nazionalitâts e 239 lenghis_ Il congrès FUENS al à vût il compit di dâ une impression de grande diviersitât dal paîs cu lis sôs minorancis. In Russie a son plui di 190 nazionalitâts e 239 lenghis e dialets.
In plui, il focus al jere su la lenghe di minorance. “O sin lâts pardabon lontan par imparâ e par zovâsi des esperiencis pratichis tal cjamp di grups etnics in Russie”, al à dit il president Hansen, che al è stât ancje president par lunc timp de piçule minorance todescje in Danimarcje. ■
JANEZ ERAT