La Austrie, che e je une vore atente al ambient, e à pensât di meti adun un gnûf regolament che al rivuarde i cicliscj e al è jentrât in vore cul Prin di Avrîl. Dut câs, i nestris cicliscj che a van là sù no àn di vê pôre, par vie che al è dut a lôr pro. La Austrie e à pensât di scugnî fâ un gnûf regolament ancje par vie che l’an passât lis venditis di bicicletis a son aumentadis di un 10% e cumò il numar al è, ce pôc ce tant, tor i sîs milions e mieç, tant a dî che un su trê al dopre la biciclete plui di une volte par setemane, seial intal timp libar seial par lâ a vore.
Di cumò indevant cuant che une corsie ciclabile – chê che e je separade de cjarezade nome di une strisse – e finìs, i cicliscj a puedin inserîsi intal trafic cul sisteme a cerniere, stant che fin in dì di vuê a scugnivin spietâ. Se invezit si trate di une piste, ven a stâi di une corsie disseparade de strade di une jeche o alc dal gjenar, i cicliscj a scuegnin dâ la precedence. Bielzà prime, intal prin câs, il ciclist al veve la precedence se la automobil al veve di zirâ a drete. Dut câs lis bicicletis no puedin traviersâ lis stradis su lis strissis pai pedons: il ciclist al scugne dismontâ e sburtâ la biciclete. Cun di plui, là che a esistin corsiis o pistis ciclabilis, i cicliscj no puedin cori su la cjarezade des machinis. Lis gnovis regulis a valin ancje pes bicicletis eletrichis – lis e-bike – che aromai a son un cuint dai ciclis vendûts.
Salacor no ducj a san che in Austrie i zovins minôrs, par podê cori su lis stradis publichis, a àn di vê un patentin di pueste. La novitât, in chest câs, e je che chest patentin si pues vêlu scomençant dai nûf agns e nome se il frutin al frecuente la cuarte elementâr. Prime de gnove norme i canais a podevin torzeonâ scomençant dai dîs agns, se a vevin il patentin, o ben dai dodis agns in sù se no lu vevin. Si sbasse ancje a vot agns la etât par zirâ cul monopatin cence la compagnadorie di un grant e cun di plui si podarà zirâ, se chest machinari nol è eletric, ancje sui marcjepîts, prudelant dut câs la sigurece dai pedons.
Si trate di aspiets positîfs, che o podaressin trai cualchi imboconade, ma al è ancje alc che nus lasse cualchi dubi. Stant che aromai pardut lis machinis le fasin di parons, al è just prudelâ chei che a doprin la biciclete. Magari cussì no, a son masse automobiliscj che no cognossin lis gnovis disposizions. A chest pont nol è clâr se lis gnovis normis a laran pardabon a pro dai cicliscj o se impen no aumentaran i pericui, massime intal câs che un automobil al ziri a drete, ancje stant che lis velocitâts dai doi mieçs a son diferentis. In sumis, plui di un al à pandût dubis su chest.
Stant che si smire di dopleâ il trafic dai ciclis in dam dai automobii dentri dal 2025, si pense a regulis diferentis par altris câs, come chel di dâ dirit di zirâ a drete ai cicliscj ancje cul semafar ros. Cun di plui si varès di stabilî une distance di un metri e mieç pai autos e pai camions che a sorpassin un ciclist; cence mancul aumentâ ancje lis pistis ciclabilis separadis, là che si pues.
La discussion politiche e sociâl no je dal sigûr semplice, ni cun di mancul dongje de conclusion, intun mont simpri mancul disponibil a dismeti lis comoditâts e la velocitât a pro di ambient e salût. ❚
Barbara Cinausero
