Si stin svicinant, tant che o savês, aes scjadincis des declarazions di IRPEF, IVZ (Impueste Valôr Zontât) e vie indenant. Par chest, o fevelìn cheste volte di une tasse curiose che lis nestris leçs no previodin, stant che la Costituzion e dîs ben a clâr che il nestri stât al è laic. In Austrie invezit, chei che a fasin part de Glesie catoliche o protestante a scuegnin paiâ ogni an une “tasse sul cult”. Par dî il vêr, no si trate pardabon di une tasse, si ben di un contribût indreçât in maniere direte ae Glesie, e calcolât sul redit pro capite. Chest contribût si lu paie ancje in altris stâts sicu la Svezie, la Finlande, la Gjermanie, la Danimarcje e la Svuizare.
Fin al 1780, la Glesie e tirave fûr ce che al coventave pal so sostentament dal propri patrimoni o di chel che e rigjavave dai siei invistiments. Cun di fat, intant che Josef II (1780-1790) al jere imperadôr, cetancj convents, badiis e glesiis a forin sierâts e lis proprietâts a jentrarin intun “fonts religjôs” che al jere aministrât dal stât, che lu doprave par paiâ il clericât e par sussidiâ lis parochiis. Intal 1939, il regjim nazist al sospindè i paiaments ae Glesie, al confiscà il fonts religjôs e al de fûr la leç sui contribûts ae Glesie, leç che e valeve par chê catoliche, par chê protestante, pe confession elvetiche, e par chê veterocatoliche de Marche Orientâl (Altkatholische Kirche Österreichs). Cuant che e finì la vuere, cheste leç e fo fate buine dal stât austriac.
Il tant di paiâ al mude daûr de confession, e in dì di vuê al è inmò intes percentuâls che al veve fissât il regjim nazist. Par altris comunitâts religjosis, dal pont di viste juridic no son previodûts contribûts.
Par fâ cualchi esempli, pe Glesie catoliche la percentuâl e je dal 1,1%, dulà che par chê protestante e je dal 1,5%, ma par cheste i impuarts a vegnis cjapâts sù in maniere direte des parochiis. A son previodudis riduzions pes fameis che a àn dome une jentrade, pai canais, pai anzians, e pes fameis cun problemis economics. Cun di plui, i conts si fasiju in mût diferent pai contadins e par chei che a tegnin i boscs. I students, i aprendiscj, i soldâts di jeve, chei che a fasin servizi civîl e chei che no lavorin no pain nuie.
I contribûts che o vin fevelât a cuvierzin sù par jù il 78% des jentradis des diocesis austriachis, che par chest si lamentin di no vê par man lis schiriis completis dai contribuents e a scuegnin domandâur di persone ai fedêi par jessi sigûrs che a pain.
Purtrop, in consecuence di cheste “tasse”, tancj di lôr che no vuelin paiâ il contribût sedi par cuistions ideologjichis sedi par motîfs economics, a bandonin la Glesie di partignince. La rinunzie e va fate in mût formâl, daûr di regulis burocratichis ben fissadis, e di chel moment indevant no si podarà plui svicinâsi ai sacraments.
In cause di chest slontanament di bande di tantis personis, massime zovinis, lis Glesiis dai stâts che o vin dit a son dûr a scombati cun problemis economics che a divegnin de mancjance di jentradis. La cuistion e je avonde penze, e lis autoritâts temporâls e eclesiastichis a varan di frontâle in curt par burî fûr une soluzion diferente.
di Barbara Cinausero