ATUALITÂT – Te ete Glocâl, la lenghe e je inovazion

A Barcelone ai 1 e 2 di Otubar si è davuelt il V seminari interladin di gjornalisim. La iniziative e je nassude midiant dal Istitût Ladin Furlan “pre Checo Placerean” (www.istitutladinfurlan.it) cu la poie de Agjenzie Regjonâl pe Lenghe Furlane (www.arlef.it).
La seconde zornade, in particolâr, e à permetût di cognossi «sul cjamp» lis esperiencis diretis di diviersis testadis catalanis (radio, tv e cuotidians) che a àn «viertis lis puartis» ai ospits furlans e ladins. Tra chestis, la esperience che e à plui impressionât pal ûs des gnovis tecnologjiis e je stade chê di Vilaweb, il prin cuotidian dome on line de Catalogne. Par cognossilu miôr o vin intervistât Vicent Partal, 49 agns, diretôr responsabil de testade.
Diretôr, nus disial i 5 ponts dal «Partal pinsîr» leât a la esperience catalane?
«Prin di dut si à di veicolâ la lenghe cu la inovazion (lenghe = inovazion, un concet che des nestris bandis al à tacât a fâsi strade dome tai ultins agns, ndr). Secont element al è il rûl de Universitât e de societât civîl (borghesie) che chi a àn vût un rûl clâf e strategjic sburtant une vore (robe che in Friûl e je une vore mancul sintude, baste viodi lis declarazions di Alessandro Calligaris, president regjonâl dai Industriâi su «Realtà industriale» di Novembar, ndr). Tierç consei che o doi al è che si à di pontâ al concet di glocâl (vê une vision locâl, fevelant la nestre lenghe, par vê une funzion globâl)– Chest parcè che no si à di vê un ategjament sotan te globalizazion, ma rindisi cont che la universalitât si le à dome cu la valorizazion ancje de nestre lenghe particolâr.
E last but not least, rivâ a mostrâ che ancje tal forest la lenghe locâl e je stade preseade, al jude a movi la braure a nivel interni (Google al nas tai Usa, ma za di cualchi an i aministradôrs di chest famôs portâl di ricercje su Internet a àn decidût che il Catalan al à di jessi une des 40 lenghis dopradis dai lôr utents: ancje in Catalogne lis robis si son mioradis cuant che il guvier locâl al à viodût che la lôr lenghe e jere preseade fûr dai confins, ancje di un colòs come Google)».
Vignint a Vilaweb, cuant nassie la testade?
«Tal 1995».
Parcè dome online?
«O cirivin di intivâ la maniere di fâ gjornalisim in linie. Noaltris fondadôrs o jerin gjornaliscj tradizionâi, che o vevin lavorât te stampe, te radio, te television…»
Cemût sêso partîts?
«E je une imprese privade, i doi socis a àn metût dal lôr i prins bêçs».
Trope int lavorie cumò?
«Cumò o lavorìn in 23 di nô».
Trops letôrs vêso ogni dì, e ogni mês?
«O vin tor dai 300.000 letôrs singui (numar di letôrs calcolât escludint chei che a fasin plui visitis)».
La publicitât trop rapresentie in pencentuâl des jentradis?
«Il 65% des jentradis a son publicitât».
Internet trop aial judât la lenghe catalane?
«E je stade un grant strument di difusion pal catalan e di braùre, dopo che o sin rivâts a vê il domini .cat».
Il nivel di scolarizazion in lenghe catalane trop aial favorît la azion dai tradutôrs volontari?
«Sì al è clâr. Di fat, ancje midiant di chest e je nassude Softcatalà, une organizazion di volontaris che a tradusin programs informatics par catalan www.softcatala.cat».
Cun dutis chestis fuarcis in cjamp, la lenghe catalane ise salve
o ise in pericul?
«O pensi che ore presint il catalan nol sedi in pericul. Ma o vin simpri plui dibisugnis, simpri di plui».
Su la television ce pensial?
«L’avignî nol è il digjitâl terestri, ma la television “a la cjarte”: il podcast al superarà il concet tradizionâl de television parcè che la int e sielzarà «cuant» e «ce» viodi cence spietâ lis trasmission denant dal “casselot”. Une sezion li che o stin investin e je propit chê di Vilaweb TV».
Lui al è ancje responsabil de comunicazion dal coordenament indipendentis, ce nus contial di chescj referendum
pe indipendence?
«Al è un moviment di base locâl che al prove di dimostrâ che la Catalogne e je preparade par frontâ un procès di indipendence dentri de Union Europeane».
Christian Romanini