ATUALITÂT – Stai de Cjargne, no stin lassâju murî

La nestre mont e à mantignude la sô bielece salvadie, la sô nature incontaminade, in gracie dal cjargnel che al à simpri amât e difindût il so teritori, parcè che chest al è stât, dilunc i secui, la sô uniche ricjece. Di almancul trê decenis in ca la situazion e je cambiade, e purtrop in piês. In plui di vê patît pe mancjance di un disvilup compatibil, favorint intratant l’esodi viers la plane, al è stât un ridimensionament di 6 a 2 rapresentants tal Consei regjonâl e e je colade la pussibilitât de istituzion de Provincie de Cjargne (par vie di un referendum strumentalizât che di fat al à vût reson), e in fin il tai des Comunitâts Montanis. In sumis, di tiere braurose dal so jessi, a  tiere depresse. Une idee di un emigrant  ilustri, Leonardo Zanier di Maranzanis di Comelians, e je stade cjapade sù de Regjon che e à istituît bants pal recupar des abitazions lassadis vuedis dai ocupants. Vâl a dî, il progjet dal albierc slargjât, pompôs tal non ma dut câs di tignî in cont tra lis robis positivis, come pûr il tentatîf dome imbastît dal sfalç dai prâts. Ma al è pardabon masse pôc. Si à di promovi une politiche incisive pe mont, cui siei abitants stanziâi in prime file. La clâf e je dal sigûr il turisim, in dutis lis sôs espressions, che no puedin sei dome chês des sagris estivis. Tocje fâ un salt di cualitât, ducj unîts, cence distinzions partitichis, cence egoisims, intun unic front comun, cul unic obietîf di salvâ la Cjargne, tacant des robis che a esistin: i stai, par esempli. Ma si sêso mai domandâts trop che al vali chest patrimoni? Al è cuasi impussibil di calcolâ. E ce si fasial di lui, là che la storie di centenârs di fameis e je lade al mancul? Lu si lasse murî te trascurance plui totâl. Par dî il vêr, cualchi  svuiç di socors al è: a son ancjemò i braçs fuarts dal cjargnel che al è sul puest, che a cirin di meti un blec in maniere cuasi disperade. Culì al covente alc altri di plui, e la politiche e varès di vignî incuintri focalizant, sostignint e prudelant cun leçs di pueste il recupar di chest patrimoni. Se si rivàs a meti in cantîr chestis soluzions, secont me, al sarès un pas decisîf sedi par un turisim fruibil che par un riordin dal paisaç che al deventarès la ponte di diamant de Cjargne. Bisugne favorî il recupar dal paisaç rurâl, in plui di inviulâ la manutenzion e la cure dal teritori: chescj a son i obietîfs di stâur daûr par salvâ i fabricâts rurâi tant che toblâts, stâi e baitis, magari cun vincui, come la sigurece  idrogjeologjiche de aree. A Auronzo, i lôr «tabià» si ristruturin ancje cun incentîfs regjonâi, ma par 10 agns no si puedin vendi. Viodudis lis robis, e cemût che a son cambiâts i timps, che si concedi cualchi ampliament o cambi di destinazion di ûs dal imobil. Un toblât, par dentri, al podarès benon dâ acet a une saune, tant par capîsi. O vin di tornâ al antîc, cjalant viers il futûr; o vin di produsi une domande di bens e di servizis sociâi che e puedi dâ un gnûf sburt a une economie tant scunide, come chê de nestre mont. I stai nus cjalin patîts, no stin lassâju slacâ. La lôr muart e je un pôc la nestre.
Dino Temil