ATUALITÂT – Scuele in Cjargne

L’inizi dal an scolastic in Cjargne al à puartât un grum di mudaments. Il plui drastic al è stât chel de sieradure des scuelis elementârs di Rigulât: masse pôcs fruts iscrits. La Aministrazion Comunâl   dutune cui gjenitôrs, tignût cont ancje pai agns a vignî de scjarsetât di fruts, e à decidût di sierâ la scuele elementâr e di mandâ i fruts a val inte scuele di Comelians a 5 km di distance, metint a disposizion il scuelebus. Cambiant cjanâl, a Darte, a son stadis sieradis, pûr vint une struture complete e eficiente, lis elementârs de frazion di Dimplan par centralizâ dut intal Comun di Darte. Dute une altre sielte e je stade fate di Trep e di Çurçuvint: i doi Comuns a àn decidût di mantignî  vierte une struture par paîs, spostant i fruts. A Trep e funzione la scuele materne, dulà che a van ancje i pins cirubits, e a Çurçuvint e je ative la scuele elementâr, dulà che a van ancje i fruts trepolans.
LA SCUELE E TEN VIVE LA COMUNITÂT_ O cjacarìn di sieltis che ben o mâl a laran a segnâ la vite dai piçui paisuts di mont. La scuele e je  simpri stade un pont di riferiment pe vite formative e sociâl dal paîs e sierâle al vûl dî judâ la sô agunie in spiete de muart definitive.
Ancje agns indaûr la scuele e à vût lis sôs dificoltâts dadis dal numar ridot di canaie ma in ciert câs e je stade mantignude distès, creant pluriclassis.
Tai agns ’50 (duncje nancje tant timp indaûr) in Pani, su domande de int dal puest, e vignive istituide la Scuele Sussidarie popolâr par cirche une desene di fruts; par rivâ in Pani lis mestris a vevin di fâ dôs oris di strade a pît dal paîs di Raviei. Simpri ta fin di chei agns, in Val Pesarine, ogni borgade e veve la sô scuele elementâr pluriclasse.
Chest al fâs pensâ ae impuartance de istruzion ancje tes piçulis comunitâts.
DILUNC DE STORIE_ La scuele in Cjargne e à agns di storie. Sgarfant tai documents si tache a fevelâ di scuelis za intal 1500; il 1700 al è un secul dulà che la scuele e cjape inmò plui fuarce in gracie ancje dal contribût economic dai cramârs che, zirant il mont, a vevin capide la impuartance dal savê lei, scrivi e fâ di cont. Tal 1858 si lei che tal distret di Rigulât (ven a stâi il Cjanâl di Guart) a son 13 scuelis, ta chel di Dimpeç 12 e in chel di Tumieç 37.
Vuê i timps a son cambiâts ma i problemis a son restâts. Dut al sta tes capacitâts des Aministrazions Comunâls, insiemi cu la int, di fâ sieltis che a puartin mancul dam aes comunitâts, soredut chês piçulis, tignint presint che la centralizazion dai servizis intun unic pont, magari a val, al pues meti in bal la vite dai paisuts di mont. E pues esisti ancje une sielte contrarie che dal bas, la scuele, si sposte in alt: Trep e Çurçuvint a àn vierte la strade.
Marta Vezzi