ATUALITÂT – Minorancis linguistichis e imprenditorie Lenghe, identitât, professionalitât

Sabide ai 13 di Novembar a Udin si fevele di lenghis e minoritariis e economie. L’apontament al è pes 9 di buinore li de sede de Cjamare di Cumierç di Udin (vie Morpurgo 4) cu la cunvigne internazionâl «Minorancis linguistichis e imprenditorie. Lenghe, identitât, professionalitât».
La iniziative e je inmaneade inte suaze des celebrazions pai siei trente agns di ativitât de cooperative Informazione Friulana, une imprese che e prodûs informazion e culture par furlan, e promôf la lenghe furlane, e dopre lis gnovis tecnologjiis e e ufrìs i siei servizis al Friûl di chenti e di chel che al è pal mont.
L’incuintri si presente tant che une ocasion di riflession e di confront tra ideis, esperiencis e prospetivis. Dal Friûl al Paîs Basc, de Sardegne ae Ladinie, de Istrie al Gales, de Corsiche ae Bretagne, de Ocitanie ae Catalogne, pes minorancis in Europe lenghe e identitât no son dome un valôr e un dirit di fonde, ma a puedin jessi ancje une oportunitât in tiermins economics. Chest aspiet – sugjerît de metude in vore de legjislazion di tutele, cjapât in considerazion di chei che a son i  indreçaments plui modernis in materie di disvilup, inovazion e sostignibilitât e confermât di tantis esperiencis imprenditoriâls che par lôr il leam tra lenghe, culture e teritori al è pardabon un fatôr competitîf  –  al vignarà cuntune schirie di intervents di imprenditôrs, esperts e operadôrs.
La cunvigne e je struturade in trê sezions tematichis: specializazion setoriâl de imprenditorie di ciertis comunitâts di minorance; informazion, comunicazion e editorie; gnovis professionalitâts tes lenghis minorizadis e sui servizis linguistics e culturâi. E sarà ancje une taule taronde dedicade aes relazions virtuosis jenfri lenghis e identitâts e turisim, marketing teritoriâl e promozion dai prodots.
Par savênt di plui: www.ondefurlane.eu.
Redazion