ATUALITÂT – Libri vert pe Sanitât-2

E va indevant la nestre racuelte di opinions di esperts dal setôr sul Libri vert prontât de Zonte regjonâl rivuart ae situazion de sanitât publiche di chenti. Dopo vê sintût il mês passât Guglielmo Pitzalis, miedi responsabil dal Servizi di medisine sociâl dal Dipartiment di prevenzion de Aziende pai Servizis Sanitaris numar 4 dal Friûl di Mieç, chest colp la peraule e passe a Giorgia Zamparo, gjornaliste publiciste, dal 2000 a Radio Onde furlane li che si ocupe di cuistions che a integnin la salût e la sanitât in regjon. Fin al 2007, la Zamparo e à curât la trasmission Cence fastidis; cumò e puarte indevant, in colaborazion cu la Ass n.4, un spazi cuindisinâl di mieze ore che al à par titul Ocjo ae salût.
Giorgia, ce pensistu dal Libri vert su la sanitât in Friûl-Vignesie Julie?
Par gno cont, in chest document si fevele e si metin dongje tantis tematichis di une politiche sanitarie regjonâl par sigûr une vore complesse. Il Libri, alore, jenfri lis sôs 35 pagjinis al met adun problematichis impuartantis ma i obietîfs no son propit tant clârs. Cun di plui, no vegnin presentâts esemplis concrets di ce che si podarès fâ e al pâr che nol vegni sugjerît nissun plan di azion efetîf.
Secont te, ce coventaressial risolvi prin di dut?
O crôt che al vadi ben pontâ in alt e fevelâ di grancj progjets, ma bisugnarès cirî intant di risolvi ancje i piçui e grancj disservizis de nestre sanitât, come il timp di spiete al telefon par cjapâ un apontament par une visite specialistiche, par un esam o par un aciertament sanitari, cence scugnî colâ tal privât, stant i timps luncs che par solit si à di spietâ.
Ce destin varano i piçui ospedâi?
Al è miôr che a stedin daûr aes esigjencis dal lôr teritori pluitost che cjapâ une lôr specifiche specializazion. Un esempli al è l’ospedâl di Sant Denêl che al à domandât di podê cuistâ in curt un machinari pe risonance magnetiche.
Di ce fevelistu te tô trasmission
Ocjo ae salût?
O cîr di tratâ dute une schirie di argoments sanitaris puartant informazions, sclariments e aprofondiments che a puedin vê une utilitât concrete: de impuartance de prevenzion ae cognossince e al ûs dai servizis metûts a disposizion dal public. Lis tematichis a son pardabon tantis e impen di fermâmi su chês cuistions di politiche sanitarie che tal imediât ae int no dan ni informazions ni rispuestis efetivis aes lôr dibisugnis reâls, par solit o ai miôr che i miedis e i specialiscj a fevelin di ce che si pues cirî di risolvi fasint alc che za al esist o che al è pussibil recuperâ.
Tal Libri vert si fevelial dal ûs des lenghis minoritariis te sanitât regjonâl?
Magari cussì no, dal ûs e de impuartance de marilenghe in sanitât no si cjacare. Al somee propit che no si vueli cjapâ in considerazion la necessitât de int di podê esprimisi te sô lenghe plui vere e spontanie, cuant che par altri e à di spiegâ robis cetant impuartantis di un ben grant come la salût.
ALESSIO POTOCCO