ATUALITÂT – «La muart, un viaç viers dulà?»

Nassi e murî a son doi elements un peât di chel altri. Un che al nas al à ancje, timp o tart, di murî. E su chest ducj o sin dacuardi. Ma cuant che o tachìn a pensâ a ce che al vûl dî vivi e murî si puedin tirâ in bal diviers aspiets.
E al è ce che al è saltât fûr inte cunvigne interessante, organizade di «Carnia in movimento», tal mês di Lui intal bosc di Musers, a Çurçuvint.
Secont il filosof Luca Grion, un dai relatôrs de serade, la filosofie e je une grande riflession su pe muart. Il famôs Platone al diseve che l’om al scuen fâ i conts cu la anime e cul cuarp. La anime e je impresonade intal cuarp e la filosofie e je la cure da la anime. Insiemi al so sucessôr Aristotele a disevin che la vite e covente ai oms par capî ce che a son e a fâ cressi in lôr ideâi di justizie.
Il concet di muart, stant al psichiatre Adriano Segatori, intal cors dai ultins agns al à cjapât une plee divierse. Une volte la muart e jere vivude, partecipade di ducj i familiârs, dai amîs come un event naturâl che al fâs part de vite. In dì di vuê la vision de muart e je divierse: la muart naturâl no esist plui, si tint a fâ crodi che si pues vivi par simpri. Dut chest ancje parcè che, secont il psichiatre, inte societât di cumò e mancje la vision sacre de muart, une vision impuartante par frontâle; i studis dai psichiatris e dai psicolics si son jemplâts e i seminaris si son svuedâts.
Altri pont di viste inmò al è stât dât dal vescul Alfredo Battisti: la muart e je un dissen misteriôs di Diu. Ancje Jesù su pe crôs al à vivût la muart cun ingôs, cun pôre tant al è che a un ciert pont al à vosât «Diu gno, Diu gno parcè mi âstu bandonât?». Ma il dì di Pasche al è resurît dai muarts, di li e je nassude la plui biele notizie: la muart che e je un viaç viers il nuie, cun Crist e je deventade il viaç viers il cîl.
«Ogni dì metêt une poltrone a man çampe e cjareçait la vuestre muart» al dîs il psichiatre «se o pensassin cussì si rindaressin cont de impuartance di ogni moment che o vin devant».
A ognidun la sô conclusion…
Marta Vezzi