ATUALITÂT – «Indreçâsi ae ONU par fâ ricognossi i nestris dirits»

In ocasion de cunvigne che si è davuelte ai 12 di Fevrâr stâts li dal palaç Belgrât, sede de Provincie di Udin, e je scaturide une gnove propueste puartade indevant dal diretôr dal Ciemen (Centre Internacional Escarré per a les Minories Ètniques i les Nacions), il catalan Aureli Argemì: i popui ancjemò cence Stât a àn di indreçâsi ae ONU, la istituzion a nivel plui alt tal mont, par fâ valê i lôr dirits. Cemût che al à sostignût Argemì dilunc de setime taule taronde inmaneade de stesse Provincie e dal Grup studis storics e sociâi di Pordenon Historia dal titul «La tutele de lenghe furlane e la Europe. Lis istituzions e lis altris esperiencis», la Organizazion des Nazions Unidis e varà di cjapâ posizion a pro de tutele di cualsisei lenghe par fâ rispietâ il dirit ae libertât linguisitiche in dut il planet.
Une propueste poiade di ducj chei altris intervignûts ae cunvigne, tacant dal «paron di cjase», il president dal ent provinciâl Pietro Fontanini, che al à dit che chest ricognossiment al à di valê ancje pal popul furlan stant che e je la sô presince la fonde de specialitât de regjon Friûl-Vignesie Julie. A colaborâ pe buine riesside de cunvigne ancje la riviste «Autonomie. Idee per il Friuli», che e je stade presentade dal so diretôr responsabil Roberto Jacovissi. Lorenzo Zanon, president de Agjenzie regjonâl pe lenghe furlane, al à invecit fevelât de politiche linguistiche puartade indevant de Arlef, mintri che William Cisilino, president dal Istitût ladin furlan pre Checo Placerean, al à tratât de cuestion de planificazion de tutele da lenghe furlane. Il professôr Federico Vicario al à po esponût la ativitât de Universitât dal Friûl a pro de marilenghe. Ae taule taronde a àn cjapât part ancje dute une schirie di politics regjonâi de maiorance e de oposizion.
Alessio Potocco