ATUALITÂT – IL SIVILOT. Ognidun al bale cun sô agne

Puar president. Al anunzie che si tornarà a candidâsi ae Regjon, al finìs par une dì sui gjornâi e dopo nissun lu calcole plui. Timps dificii par Tondo e pe sô maiorance, simpri plui litigante al so interni, no par motîfs programatics nobii ma pes poltronis tai varis conseis di aministrazion.
Al sucêt cussì che une notizie tant che chê de ricandidadure e somee plui un bombardament tatic, par evitâ che i scuintris si slargjin e a fasin ancjemò plui vitimis. Il president al somee che al vueli afermâ la sô sucession naturâl, tant che unic at in stât di garantî la unitât de coalizion di centridiestre. Ma nol somee che i amîs le vedin tignude in grande considerazion, viodût che la formazion des listis aes aministrativis e je stade fate inte confusion plui complete e lis listis dulà che il candidât al rapresente la coalizion al guvier regjonâl a son pocjutis. Al è vêr che i vetos nazionâi tra Udc e Lega in cualchi mût a àn influît, che la presince di Futuro e Libertà si pues notâ in cualchi   situazion, ma la impression gjenerâl e je che ognidun al vedi “balât cun so agne”. Dut câs, al prin pont dai programs, plui l’asset interni dai partîts, lis basis di lanç di carieris istituzionâls, che i interès citadins, cun intervents pesants des segretariis intes sieltis dai candidâts.
Al baste pensâ a Triest, a Pordenon, là che si è assistût plui al scambi di figurinis che al dibatiment sui temis reâi.
Di sigûr, a ecezion forsit di cualchi piçule realtât, si note la assence di listis cun carateristichis autonomis fuartis; al somee che ancje lis veris civichis si cjatin in dificoltât. Dal rest, chê plui rapresentative e vincidore la tornade passade – ven a stâi Tor di Zuin – no ise stade silurade di acuardis trasversâi tra centridiestre e centriçampe?
Infin, une constatazion amare. Nissune liste in maniere declarade – ma nancje di sot vôs – furlaniste.
Un brut segnâl o un segnâl e baste par fânus rifleti?
Rispuint.
L’OM DI BURI