ATUALITÂT – Il sindacât in Sardegne al firme pe Nazion Sarde

Il prossim consei regjonâl de Sardegne che si tignarà a metât di Setembar al varà tal ordin dal dì un argoment di puartade fondamentâl pal avignî de regjon speciâl: il gnûf statût di autonomie.
Si discutaran la mozion indipendentiste dal PSdAz (Partît Sart di Azion, ndr), diviers dissens di leç par modificâ il statût e il document dai sindacâts che o cjatais chi dongje in struc. Si trate di un document des trê confederazions talianis scrit dopo di une riunion cui propris iscrits e cun rapresentants dai partîts e grups politics tal Consei regjonâl.
INIZIATIVE DAI SINDACÂTS_ Il motôr e je la Cisl e la Cgil si è metude in code, adun cu la Uil, acetantil concet di nazion sarde e lis conseguencis politics leadis a chest… une robe inaudide pôc timp indaûr pal sindacât postcomunist.
Si à di visâsi di cemût che il Pci, dilunc dai tancj agns di impegn che a puartarin la lenghe sarde a jessi cjapade dentri tra lis minorancis linguistichis storichis metint in vore la Costituzion, adun cui siei inteletuâi, organizazions cooperativistichis e sindacâts e chês altris «cenglis di trasmission», al è simpri stât in maniere une vore fuarte cuintri de lenghe sarde e des ipotesis di nazion sarde e di autodecision.
Probabil che lis afermazions positivis dal document a varan inmò di jessi digjeridis e soredut metudis in pratiche stant che a son ancjemò une vore verticistichis, ma la robe no je negative.
I PAS DAL CENTRIDRETE_  Cheste posizion politiche gnove, a prin viodi sorprendente, e nas dal fat che il centridrete, che al guvierne la Regjon ancje cul PSdAz che al à molât lis çampis, al à riscrit il statût sart te legjislature passade (viôt www.statutosardegna.eu) cun contignûts di sovranitât e nazionalitaris une vore indevant, tignint come element centrâl la lenghe sarde. Al è stât un lavôr lunc doi agns cul coinvolziment plen dai grups in Consei regjonâl dal centridrete, in chê volte a la oposizion.
Il grup, formât di esperts autonims che a àn lavorât in maniere gratuite e trasversâl, al à funzionât ancje come «stage» permanent pai conseîrs regjonâi e dirigjents politics che si son riciclâts in maniere inpietade e positive al nazionalitarisim sart. Chest al à facilitât la jentrade tal centridrete dal PSdAz su chestis fondis programatichis e la vitorie eletorâl, splaçant e no pôc la çampe che e je stade sconfite par chest.
Di no sotvalutâ la ativitât di gnûfs moviments indipendentiscj che in maniere sorprendente a catalizin grant consens tra i zovins, deventant cuasi une mode zovanîl cun percentuâls altis tes elezions aministrativis.
NOVITÂTS IN CONSEI REGJONÂL_ La propueste di gnûf Statût sart dal centridrete, par cumò e somee il progjet plui indevant tra chês federalistis presentadis ancje su la penisule, probabilmentri in fuarce de tradizion pardabon federaliste de Sardegne, pal sô sardisim che al precêt dispès altris fenomens continentâi compagns.
Il centridrete al è convint di cheste tesi e al à splaçât il centriçampe che nol à propuestis e al à di riposizionâsi di corse sul argoment e come simpri cirint di passâlu magari cuntune riconversion svelte di gjenar indipendentist.
Lis sôs «cenglis di trasmission» sindacâls par cumò sul plan dal principi, a son che a provin. Viodarìn ce che al devente.
Mario Carboni