ATUALITÂT – Il cûr de tifoserie dal Udin al bat par furlan

President ce pensial de colaborazion tra lis nestris dôs testadis?
«L’Udin, come pocjis altris realtâts sportivis, nol rapresente dome une societât di balon, ma al è la braure di un popul cu la sô tiere e la sô lenghe. Par chest o pensìn che fevelâ di Udin cui furlans par furlan al sedi indispensabil. O sin onorâts di podê, midiant de Vuestre colaborazion une vore preziose, svicinâsi inmò di plui ai tifôs, stant che par une vore di nô, il furlan al è inmò la prime lenghe di conversazion. Metint particolâr atenzion ancje ai tifôs emigrâts, che a son in dut il mont, si sin rindûts cont che in diviers câs i furlans emigrâts a fevelin dome par furlan e la lenghe de tiere che ju ospite. La version par furlan dal nestri sît (www.udineseclub.net) curade de vuestre redazion, e je duncje un segnâl inecuivocabil dal leam indissolubil dal nestri Udin al nestri Friûl».
O vin viodût un scandai resint sul vuestri sît li che l’imni storic di Dario Zampa al risulte jessi preferît dai vuestris letôrs: cemût valutial chest risultât? Ancje al stadi nus risulte che chest imni al sedi une vore preseât…
«Il public dal Udin al è, pe plui grande part, componût dal famôs «çucul dûr» che, de famose imprese di Giacomini (de serie C ae serie A), al è inmò une vore presint e duncje leât cul fîl dopli cun «Alè Udin» di Dario Zampa, autentiche colone sonore di agns maraveôs no dome pai sucès sportîfs. Al reste ben clâr che lis fortunis atuâls dal Udin, comprindude la prime cualificazion in Champions League, a son leadis al imni atuâl e par chest i plui zovins lu preferissin».
Ce pensial dal fat che tal Udin no son zuiadôrs furlans?
«O volarès rispuindi cuntun lûc comun che al è: «i fantats furlans no àn plui fam» e lu sclarìs cul esempli dai fantats forescj, un su ducj Felipe che, cuant che al è rivât in Italie, al fo sistemât li dal Convit di Cividât e, ogni buinore, dopo de scuele, al cjapave la famose «litorine» (il trenut che al coleghe Cividât cun Udin) par lâ a alenâsi. Dut chest cence vê dongje la sô famee e lontan 9 oris di avion di cjase sô, cun dut ce che al compuarte, par viodi, dopo trê agns, realizât il so insium di deventâ zuiadôr professionist. Cumò o domandi a un gjenitôr furlan se al mandarès il fi di 14 agns intun paisut brasilian a cirî furtune o, se il stes frut al larès di sô volontât. Cheste par me e je la reson».
Ce aie previodût la Auc par promovi la furlanetât tal stadi?
«Cun grant plasê o vin esaudît il nestri plui grant desideri di tornâ a vê il bandieron cu la Acuile dal Friûl tai Distints centrâi (il setôr di front de Tribune cuvierte, ndr) dopo che lis normativis resintis nus vevin obleâts a gjavâ chel di prime parcè che nol jere a norme; par chest il nestri plui sintût grazie al va al Presindent Pietro Fontanini pal contribût che la Provincie di Udin nus à dât. Magari cussì no propit lis normativis resintis in cont di sigurece a àn simpri di plui «disincentivât» chel folclôr, tipic dal nestri stadi, che si è fat cognossi tai agns e al è stât simbul dal nestri jessi furlans. Dut câs, la nestre intenzion e je chê di tignî dûr, massime continuant a mostrâ la nestre serenitât, sportivitât e coretece sui spalts; ancje chest al è un grant segnâl di furlanetât».
I plasaressie une seconde maie uficiâl cui colôrs zâl e blu e sul pet la Acuile dal Friûl (no chê de Regjon)?
«Sì, in maniere assolude; ancje se lis leçs assurdis dal marketing a imponin di gambiâ maie ogni an, la Acuile de Patrie invezit e podarès deventâ un pont fer, un simbul e un ulteriôr leam strent di cheste scuadre cul Friûl. Tra l’altri di cualchi an e esist za une maie zale. Al bastarès dome cjatâ une soluzion grafiche valide e o soi sigûr che e varès une sucès grandonon tra i tifôs».
Vêso contats cu lis tifosariis di scuadris li che a son minorancis linguistichis, par esempli: Barcelone, Atletico Bilbao, e vie indevant?
«Gjavant i tifôs dal Cagliari, che cun lôr o vin otims rapuarts stant la sede dal Circul dai Sarts che e je ai Riçs, no ‘nt vin altris in Europe, parcè che, magari cussì no, al mancje il timp par aprofondî chest gjenar di contats».
Christian Romanini