ATUALITÂT. I grancj dal secul stât

Lis bataiis, la braure, l’impegn dai avocats furlans dal Nûfcent, espression di une tiere e di une societât coltadis tai secui cu la semence di une storie pardabon uniche e masse pôc cognossude. A contâlis al è Nino Orlandi, avocat di Udin, che intun libri titulât «Come eravamo. Storie di avvocati friulani del secolo appena trascorso» (ed. Marsilio), al met dongje lis storiis e lis cronachis di int come Tiziano Tessitori, Loris Fortuna, Antonio Comelli, Guglielmo Pelizzo, protagoniscj no dome tes aulis dai tribunâi ma te vite publiche dal Friûl e dal Paîs.
Fermant su cjarte chestis contis, Orlandi si propon di meti in granâr, al sigûr, une memorie che e varès di jessi coletive e che soredut i plui zovins a varessin di fâ lôr.
I avocats («no dome un mistîr – seont Orlandi – ma ancje art») de Piçule Patrie a àn rapresentât naturalmentri la classe dirigjente de societât, pe bisugne di jessi part ative de vite publiche.
Ce che tancj a dismentein al è che diviers dai plui grancj juriscj talians dal secul passât a son furlans. Baste il non di Vincenzo Manzini, jenfri chei che a àn scrit il Codiç Penâl; o di Francesco Cargnelutti, forsit il plui grant dal Nûfcent.
Il Friûl al à vût oms come Giovanni Battista Valentinis, nobil di nassite e cûr, poete, poligraf, o Rino Batocletti, liende a Cividât, fermade tes pagjinis dal libri «Vedrò Singapore» di Piero Chiara.
Par capî chestis personalitâts bisugne cjalâ plui indaûr, lontan tal timp, lant a cirî lis lidrîs di une tiere che e je stade un Stât: il Patriarcjât di Aquilee.
Parcè che nuie al sucêt par câs.
SONIA SICCO