ATUALITÂT – Domande e ufierte

Une des cuistions plui evidentis che a vegnin fûr tai incuintris cui emigrants e je la lamentede di bande des associazions sul fat che la etât medie dai socis si alce simpri di plui e i zovins no si sdongjin. Chê altre cjampane spes e rispuint disint che no si identifiche cu la ativitât dai sodalizis. Anzit i zovins a rilancin domandant l’insegnament de lenghe furlane, par no pierdi il leam cu la culture de tiere dai paris e mantignî il sens de identitât furlane. Al è sucedût ancje a Maian te setime cunvigne di «Ente Friuli nel Mondo».
Forsit che la soluzion e stedi chi? Lis primis nozions di economie a insegnin che sul marcjât al vinç cui che al rive a sfrutâ miôr il rapuart tra domande e ufierte.
La tindince dai ultins timps e je chê di presentâ lis associazions di emigrants tant che potenziâi riferiments pai rapuarts economics e comerciâi, dismenteant però che a esistin za ents (cjamaris di cumierç su dutis o, come par altris regjons, i «consulturis») che a puedin lavorâ pal miôr su chest aspiet specific.
Ce che a puedin fâ dome lis associazions al è infuartî i leams culturâi e identitaris che no je nissune buteghe o imprese che e pues fâlu tal lôr puest. E un dai trois principâi che a menin di chê bande al è l’insegnament de culture e des lidrîs furlanis, passant prin di dut traviers l’insegnament de lenghe furlane. Dome cussì si podarà continuâ a passâ chel «testemoni» clamât «identitât furlane» di une gjenerazion a di chê altre. Un «testemoni» che al à permetût ai nestris emigrants di vuadagnâsi stime e fiducie tai paîs dulà che a rivavin, e che cumò a varessin tante gole di rindisi utii ancje in Patrie, deventant, come che nus diseve in Avost ancje Sandra Pizzolitto, ministre dal disvilup economic e dal cumierç dal Ontario, canâl privilegjât pe economie tra i diviers stâts.
(Redazion)