ATUALITÂT – Chei che a scjampin

O cognòs aromai di tant timp Fabbro, prime tant che sindic di Palaçûl, po dopo tant che president de ARLeF e cumò come unic esponent dal Pd che si declari autonomist. No rivi ancjemò a cunvincilu de necessitât di un partît furlan, che nol vedi di jessi sotan di une organizazion politiche taliane. Timp al timp, ma cheste premesse par dî che nol covente jessi dacuardi par mantignî un rispiet par posizions ancje diviersis.
Rispiet alore prin di dut, chel che il sindic di Pordenon Bolzonello nol à dimostrât cuntun nestri gjornalist che di tancj dîs al veve domandât di podêlu intervistâ pe Patrie.
Cuntune pofardie pardabon fastidiose, no nus à degnâts di une rispueste, metint in dificoltât ancje la sô segretarie che i visave l’impegn.
Cun scletece: secont me, Bolzonello al à vude pôre di rispuindi su cuestions che a rivuardin il Friûl e il furlan te sô citât e provincie. Forsit, al varès di dânus une rispueste de cancelazion de marilenghe tal so comun, de sô ostilitât declarade viers ogni alc che al savedi di furlan.
Un dai tancj dal centri çampe che invezit di rispuindi e di declarâsi magari contrari, a sbrissin vie tant che bilitis, pensant che il stâ platâts al sedi miôr di une  discussion sclete.
A è il destin di une classe di sorestants a Pordenon e a Gurize in particolâr, che a fuarce di no inschiriâsi e fâ fente di jessi superiôrs a “beghis di cjampanîl”, e finirà drete te vuate di Vignesie e di Triest: copade e sparniçade, cence sperancis.
Ma si viôt che i va ben cussì, e nancje cent Fabbro a rivaran a fâur cambiâ strade.
Il Diretôr