ATUALITÂT – Gianni Stelitano: «cemût o ai fate la lauree trienâl par furlan ae Universitât dal Friûl»

E je finide come che e doveve, al à stret lis mans dai professôrs cu la bandiere dal Friûl su lis spalis e al à dât une bussade a la sô femine. Laureâsi nol è mai un zûc par fruts, come che si dîs. Ancjemò di mancul se a deventâ dotôr al è un dispatussât di 44 agns che al lavore al pront socors di Palme e che a cjase al à trê frutinis che lu spietin. Ma Gianni Stelitano di Codroip al è rivât insom dal so obietîf: il Cors di lauree di tre agns in Siencis Motoriis, ae facoltât di Medisine di Udin. Joibe ai 28 di Avrîl, a Glemone, al à discutude la tesi su “La muart cardiache subitanie e la rianimazion cardiopolmonâr”. Par furlan, clâr.
«Biele: e je stade propit une biele emozion. Pense che il president de comission al jere di Milan però nol à vût fastidis. Mi à dit: “Tu fevele pûr te tô lenghe: se jo no capìs alc, o voi a cjalâmi la tesi”». Di fat, il lavôr conclusîf al è stât scrit par talian, ma dome parcè che Gianni al à pensât a un test divulgatîf che al spieghe ce fâ cuant che a une persone i ven imbast intant de ativitât sportive. «Piçui acorgjiments che o podìn cjapâ ducj e che a puedin contribuî a salvâ la vite de int intant che si spietin i sanitaris dal 118. O ai realizât ancje un manifest che al presente in struc l’algoritmi de  rianimazion e che mi plasarès che al fos distribuît aes societâts sportivis, aes palestris e tai cjamps di balon. Ve, chel lu ai fat sedi par talian che par furlan».
La Patrie dal Friûl e veve za contade la storie di Stelitano, tal 2009, cuant che e veve savût che al faseve ducj i esams orâi par furlan. «Eh sì, la prime robe che o ai fat cuant che mi soi iscrit ae facoltât e je stade di domandâ se o podevi sostignîju in marilenghe. In chê volte al jere ancjemò retôr Furio Honsell. Mi è stât dit che se il professôr nol à problemis, si pues fâ. Clâr, dome chei orâi parcè che fâ i scrits al sarès stât complicât sedi par me, sedi par chel che dopo al veve di coreziju». Un amôr, chel pal furlan, che Gianni al à simpri vût.
Agns fa al è stât a vivi a Milan e li al à capît trop grandis che a son lis sôs lidrîs: «O fevelavi in marilenghe cun mê mari al telefon e la int mi rideve daûr. Ma parcè? E je la me lenghe… mi domandavi». Te Universitât nol à cjatât ostacui ancje se i siei coleghis di studi no i son lâts masse daûr. «A son zovins, atents ancjemò a ce che al pense un di chel altri. Jo, de mê bande o ai la etât e la cussience che o pues fâ valê i mei dirits», al va indenant. E propit sui dirits al bat il dêt. «Secont me, la Universitât di Udin e varès di fâ savê a ducj i students che i esams si puedin sostignî par furlan. No vin noaltris di lâ a domandâ se o podìn fâlu, e varès di jessi une robe naturâl». Dut câs, cumò e je finide, 92 al è stât il risultât finâl. «Tal ultin an, o soi rivât a frecuentâ pôc i cors, duncje par me e je une buine votazion. E o soi content soredut parcè che la tesi e je plasude. Figuriti che e je durade di plui la discussion cui docents che no la mê esposizion». Une volte cjapat flât de fature, Gianni al varès voie di tradusi par furlan il so lavôr par dâlu ai ats ancje in marilenghe: «Ma la femine mi à cjalât di stuart come a dîmi “Cumò vonde!”. Mi è stade simpri dongje, cuntune famee numerose al è simpri alc ce fâ e al è just cumò che o stedi di plui cun lôr». Intant, però, al met a disposizion di ducj i interessâts il manifest cul algoritmi de rianimazion, scrit par talian e par furlan, che si pues picjâ dulà che al covente. Cui che al à voie di ricevi il scheme, vie e-mail, al pues domandâlu diretementri a Gianni, scrivint a problsd @ libero.it
Valentina Pagani