ATUALITÂT – AI 32 DI MAI. Ise plui dificile la diagnosi o la cure?

Prime di lâ in pension, gno pari al faseve il miedi, e al lavorave un grum. Jessint furlan, naturalmentri, al lavore un grum ancje cumò che al è in pension, ma no sin chi a fevelâ di chel.
Lu ai simpri viodût strac ae fin de zornade, e no capivi masse ce fadie che e fos a fâ visitis e a prescrivi medisinis.  La veretât e je che jessi miedi, in Friûl, a vûl dî bataiâ, prime che cu lis malatiis, ancje cui malâts.
Prin di dut, bisugne tignî a ments cuâl che al è il passetimp preferît di ducj i furlans: fâ dut di bessôi. Prime di clamâ un eletricist, il furlan al prove a mateâ cui fîi; prime di clamâ un marangon, al prove a mateâ cu la see e cul martiel; prime di clamâ il zardinîr, al matee cul falcet. E cussì, naturalmentri, prime di clamâ il miedi il furlan al matee cun medisinis e jerbis fin che no si rint cont che al à propite bisugne dal dotôr. E cun dut chel mateâ cun fîi, seis, martiei e falcets, al è clâr che il dotôr al covente avonde dispès.
Dut câs, e je une seconde carateristiche dai furlans che e fâs deventâ dificil il mistîr di miedi: no si lamentin mai di nuie. Duncje, ancje par chel, a van dal miedi cuant che la malatie e je bielzà lade indevant, e cuant che a rivin tal ambulatori no facilitin lis robis.
Provait a imagjinâ: «Alore, siorute, i fasial mâl se o frachi chi?»
«Ma no, no: no pues lamentâmi.»
«E chi?»
«No, che nol stedi a disturbâsi, dotôr, nol va tant mâl».
O capirês ancje voaltris che fâ une diagnosi al devente dificil come lâ al stadi a Udin cence cjapâ la ploie.
Cence fevelâ di trop sparagnins che a son:
«Siôr, che mi disi Trentetrê»
«Trenteun vadial ben istès?»
Dut câs, un bon dotôr al è usât a chestis robis e al rive distès a fâ la sô prescrizion pe cure. Ma al è propite in chel moment che e scomence la part plui dificile di dutis: fâsi scoltâ.
Si, parcè che la robe plui strambe, tal rapuart di un furlan cul so miedi, e je chê: la ribelion. Propite cussì: il furlan, cussì usât a ubidî ae leç e ae autoritât, improvisementri, devant dal miedi si ribele e al decît di no lâ daûr dai siei conseis.
Al è scuasit matematic, al sucêt tal novante par cent des malatiis. O almancul in dutis chês che, par vuarî, e covente «une setemane di ripôs assolût».
BETE DI SPERE