ATUALITÂT – Acuerel talianot

Di agns, lis tantis associazions de diaspore a organizin – cu la poie dai ents locâi – viaçs di studi pai fîs e pai dissendents dai emigrants che, soredut di Istât, a àn la oportunitât di visitâ la tiere di origjin dai lôr vons. Chestis missions a varessin di rinfuarçâ la identitât, la lenghe e la culture furlane, stimolant intai fantats il sens di apartignince al Friûl, favorint – cuant che a tornaran indaûr tai stâts di residence – la promozion di manifestazions, incuintris e iniziativis conviviâls indreçadis a rilançâ Circui, Fogolârs, Fameis, e v.i., dulà che la etât medie dai ativiscj e je par solit une vore alte. Simpri plui dispès chest nol sucêt, e il Friûl al devente une semplice plateforme logjistiche che e paie, une curnîs che e ospite, jemplade di cors di talian, di business, visitis a Triest, a Rome o intai Paîs confinants. In chest mût, il cuadrut di tornâ a puartâ a cjase pai fantats al devente un acuerel confusionât, in stîl “grant tour”. «Ah sì, il Friûl, la tiere dai miei basavons, plene di centris comerciâi… O vin mangjât la polente, la pize e dopo o sin lâts a viodi Place Sant Marc, Redipulie e Triest». Plui voltis al sarà capitât di scoltâ discors simii.
CUALCHI ECEZION_ Pocjis, magari cussì no, a son ancje lis oportunitâts di incuintri cu lis associazions e i zovins furlans: dut al è pensât dai adults e no pues jessi la serade in discoteche a fâ “frescje” la organizazion. Esperience un pôc diferente – ancje se no je mancjade nancje li la gjite a Vignesie e in Cravuazie – chê vivude di 22 ativiscj zovins de Alef (Associazion Emigrants Furlans Lavoradôrs) che intai dîs passâts a Cividât a àn cjatât Christian Romanini che ur à presentât il nestri mensîl. I vincj fantats – cuasi ducj laureâts e libars professioniscj – che a vegnin de Argjentine e i doi dal Paraguay a àn disfueât cun curiositât la riviste, e mitiche e je stade la foto cu la bandiere dal Friûl – “Chê juste!”, a àn zontât.
Tra di lôr ancje Sandra Leòn dal Paranà, studis di comunicazion aes spalis e tante voie di riscuvierzi lis lidrîs de sô famee: «Il prin fin di setemane libar che o vin vût, pluitost che visitâ cualchi lûc turistic, o ai vût miôr organizâmi, e bessole o soi lade a Raussêt: Par me al jere plui impuartant: e je stade une vere emozion viodi la cjase di gno nono! Cumò il gno desideri al è chel di tornâ cun gno pari par che ancje lui al puedi viodi il Friûl e la cjase de sô famee».
Daniele Martina