E je mancjade, ai 2 di Mai stâts, Angela Felice, pont di riferiment de culture e dal teatri furlans. E veve 69 agns. Nassude a Sant Denêl, daspò la lauree in Letaris ae Universitât di Triest e il dotorât di ricercje a Rome, al veve sielt di insegnâ. Docente di leterature taliane e latine tes scuelis superiôrs e consulente sientifiche pal Ministeri de Publiche istruzion (e jere stade responsabile dal setôr teatri-scuele a nivel talian), e veve puartât indevant intune la passion pal teatri. E deventà cussì diretore artistiche dal Teatro Club (e e tacâ a recensî spetacui pal Gazzettino), de stagjon di Akropolis, vicepresidente dal Ent regjonâl teatrâl dal Friûl-Vignesie Julie e anime dal Palio teatrale studentesco. Tantis lis publicazions su rivistis specializadis e par cjasis editoris. Di diretore dal Centro studi “Pier Paolo Pasolini” di Cjasarse (che e vuidà par agns a tacâ dal 2009) e à contribuît in maniere determinante a fâ cognossi in dut il mont la figure e la opare dal poete e inteletuâl e de istituzion furlane.
E propit a Cjasarse, nancje un mês prime de sô muart, o ai viodût Angela pe ultime volte. O vevin di fevelâ tune cunvigne, inmaneade te suaze de Fieste de Patrie dal Friûl, sul teme de identitât e des sôs dinamichis tal Friûl di vuê, tacant di Pasolini e rivant al presint. Di cualchi zornade no stave nie ben – il mâl che le à puartade vie, le veve a pene cjapade e jê nancje lu saveve -, e pûr no veve volût mancjâ al apontament. Si jere preparade cun scrupul, come che e faseve simpri. E cui siei sfueis sot man, plens di aponts ordenâts, e veve cjapât ducj i presints fevelant a braç, cun passion e competence, dal so Pier Paolo: Angela lu clamave par non, tant che un di famee. Tornant a cjase insiemi, o vin fevelât dut il timp di Friûl, de culture e de lenghe furlanis – che jê tant e veve a cjâr -, di cemût che lis vivin i zovins, chei zovins che e veve tant a cûr, atente come pôcs a imagjinâ par lôr un avignî cuintri il vueit dal presint e a lavorâ di conseguence.
Femine di grande sensibilitât e profonde inteligjence, apassionade e gjenerose, studiade (di teatri indi saveve cetant e no smeteve mai di studiâ, di cirî titui gnûfs di autôrs e tescj), e à cirût di fâ valê tal mont de culture furlane i ponts di viste e lis sensibilitâts des feminis. Angela nus veve regalât, pal numar di Març da La Patrie dal Friûl, une riflession articolade su la situazion dal teatri furlan di vuê, sclete come che e jere jê. Mai complasente cul podê – di amirâ, duncje, ancje par chest – e critiche su lis tantis iniziativis culturâls autoreferenziâls fatis cun bêçs publics, le moveve, in dut ce che e faseve, la convinzion che la culture e fos il motôr pe cressite civîl de comunitât, in particolâr des gnovis gjenerazions. Un esempli di seguî. Vuê plui di simpri.
Cungjò, Angela.
di Erika Adami
