Alessandra Kersevan (par cure di), Amalârs, antologjie de leterature furlane, Udin 2001

“Une lenghe no je sôl une materie di studi: e je prin di dut e sore dut un imprest par pandi pinsîrs, emozions, ideis, informazions; par descrivi, spiegâ, argomentâ, risolvi problemis. Il mieç par metisi in rapuart cun chei altris, par meti in pratiche, di bessôi o in cunvigne, lis nestris intenzions. La lenghe, une lenghe cualsisei, e je la ‘robe’ culturâl plui insedade te nestre storie di oms e di feminis”.
Cussì e scomence la prefazion (di Silvana Schiavi Fachin) a la antolgjie de leterature furlane che Alessandra Kersevan e à metût adun e publicât uns dîs agns in daûr.
Antologjie e vûl dî une sielte. E par sielzi, al è evident, i vûl cognossi la materie, dute la materie. Un lavoron! Ma il risultât al è un imprest didatic di prime cualitât. Indispensabil, o disarès, par cui che al à o che al varà l’assum di insegnâ il furlan e la culture furlane intes scuelis o ancje in cors di pueste.
I tescj sielzûts e ripuartâts a son intropâts in siet sezions tematichis: i cuatri elements di fonde di dut il creât, vâl a dî fûc, aghe, aiar, tiere e po il timp, la peraule e la int. E ven fûr une vision di insieme de leterature furlane ben peade a la storie culturâl e umane dal Friûl di lunc dai secui: poesiis, prosis di art, tradizions, leiendis, traduzions, ma ancje articui di gjornâi, pagjinis di diari, tescj di cjançons e di publicitâts, fumuts, senegjaturis, teatri. Di chest pont di viste amalârs al è un test di fonde par ognidun che al vedi voie di cognossi ben l’ambient e la tiere dulà che al vîf sedi in sens sincronic che diacronic.
Di chê altre bande ducj i imprescj di aprofodiment linguistic, lis schedis di lavôr, lis propuestis didatichis, lis nozions di metriche, lis notis di spiegazion a son une benedizion par ogni frut che si cjati a imparâ o a sodâ il so furlan. E no si trate dome di lenghe, si trate di culture, di formazion, di cusience, si trate di imparâ a capî il mont, a resonâ, a fâsi ideis su lis robis de vite.
Cun di fat, par chel che al inten i argoments tratâts, nol mancje nuie: ni la nature stilizade de tradizion çorutiane, ma nancje la miserie, la emigrazion, la subalternitât des feminis, il lavôr, lis vueris e altris disgraziis.
Naturalmentri ancje Alessandra si cjate devant cualchi probleme. Un al è cence mancul chel de coinè e de grafie e des variants. Probleme risolt cun sgrimie, come che si pues constatâ leint lis cinc pagjinis de introduzion e i tocs di autôrs tant che Leo Zanier, Pier Pauli Pasolini, Novella Cantarutti, Celso Macôr, Beno Fignon e altris: che nissun di lôr al à scrit in coinè. E darest nancje amalârs no je une peraule di coinè… ■
Laurin Zuan Nardin