Alessandra Chiandetti e vinç il concors fotografic e e regale il prin premi ae Patrie

Joibe ai 3 di Avrîl tal Palaç de Provincie di Udin, che par interessament diret dal President Pietro Fontanini e à colaborât pe realizazion dal concors fotografic, si è tignude la cerimonie di premiazion di “La tô Patrie intun click”.
La jurie dal premi e jere componude dal diretôr de riviste Dree Valcic, dal espert di fotografie Pierluigi Micelli e dal nestri grafic e fotograf Pier Antonio Zanini.
Lis 12 fotografiis rivadis in finâl a son stadis chês che mês par mês a son stadis sieltis par jessi publicadis su la riviste.
Prin di dut la jurie e à declarade la sô sodisfazion pe cualitât des fotos e in particolâr e à cjapât at che par cheste prime edizion il teme che plui al à ispirât i partecipants e je stade la mont.
A ducj lôr a son rivâts compliments de Jurie e il grazie de riviste pe partecipazion e par vê onorât cu la lôr sensibilitât il nestri biel Friûl, che al jere la finalitât di chest concors ven a stâi celebrâ la nestre Patrie. La jurie e à tignût cont no dome dal nivel tecnic, ma ancje e soredut dal messaç di chestis fotos che si son dimostradis chês plui identificativis dal Friûl e che a àn dât il miôr risultât tra dutis chês rivadis.
Tal verbâl de jurie e je stade duncje individuade la classifiche che o ripuartìn:
«AL PRIN PUEST: “pal omaç ae Cjargne, la Mari dal Friûl” si classifiche al prin puest la foto di TUMIEÇ VIODUDE DE MONT DI VERZEGNIS di Alessandra Chiandetti di Osôf».
La vincidore e à volût lassâ il premi ae Patrie, tant che segnâl di agrât: a jê i va il ringraziament di ducj nô.
Il verbâl de jurie al va indevant cul rest de classifiche:
«AL SECONT PUEST O VIN UN EX AEQUO: “par vê presentât in maniere origjinâl e ecuilibrade doi simbui de mont furlane” si classifichin al secont puest ex aequo IL GILBERTI TE NÊF di Mara Mardero e IL TOR DI GJIVIANO” di Bruno Caldana di Udin.
AL TIERÇ PUEST: “pe atmosfere oniriche di un paîs poiât tra cîl e tiere”, si classifiche al tierç puest la foto CLAVAIS di Andrea Tomasin di Mortean.
Tignint cont dal impegn e dal nivel gjenerâl des fotos, la Jurie e à ancje decidût di considerâ chês altris fotos finalistis dutis ex aequo al cuart puest».
Lis fotos rivadis in finâl a son stadis:
FEVRÂR 2013: Mara Mardero di Glemone: ripâr Gilberti, su la mont Cjanine
MARç 2013:Marco Vidoni di Buie: Feagne di gnot (glesie s. michêl in cjistiel)
AVRÎL 2013:Silvia Milocco di Sant Vît de Tor: Cjase viere a Paluce
MAI 2013: Angelo Moras di Cjampfuarmint: Pofavri
JUGN 2013: Sergio Briante di Buie: Casere Bordaie a Fors Davotri
LUI 2013: Alessandra Chiandetti di Osôf: passion pai lens, la loze
AVOST 2013:Alessandra Chiandetti di Osôf: Tumieç viodude de mont di Verzegnis
SETEMBAR 2013: Bruno Caldana di Udin: il tor di Gjiviano
OTUBAR 2013: Andrea Tomasin di Mortean: Clavais te fumate
NOVEMBAR 2013: Roberta Michieli di Dedeà (morâr a cuar di Rosacis) e Giuliano Zelco di Tavagnà (crôs di len trincee su la mont Paulâr)
DICEMBAR 2013: Martina Borsatti di Piotello (MI): Rai di soreli parsore Claut ❚
✒ Redazion