AL CINE CUN BETE. La grande cjacarade

Tai ultins timps, tai ambients cinematografics no si fevele altri che di “La grande bielece” e dal so sucès. No rivi propit a capî cemût mai, invezit, che nissun al vedi fevelât di “La grande cjacarade”, dal famôs regjist Lignanin.
La storie e je ambientade tai salots de “Udin ben”, dulà che il gjornalist Bepi Gambardutti ogni dì al bêf cuatri spritz e un un par doi cui siei amîs inteletuâi (bielissime incuadrature di place Sant Jacum al tramont, intant che i protagoniscj a fevelin di nuie).
Bepi al lavore pal gjornâl di Dadute, che in plui di vê il non plui stramp dal mont, e je ancje piçule, ma tant piçule che a Lignan, tal mâr, e rive dulà che no tocje cui pîts prime ancjemò di jessi dongje dai pâi di “limit aghe sigure” (bielissime incuadrature di une bielissime cjase di Udin, dulà che no si viôt Dadute, parcè che e je masse basse par rivâ li de cineprese).
Bepi al finìs 65 agns, e sarès ore di lâ in pension ma jessint che lui nol fâs nuie, al continue a lavorâ e al decît ancje di scrivi un libri (bielissime incuadrature dal Cjistiel di Udin. O ce biel Cjistiel a Udin).
Al cognòs ancje une muinie e, par compensâ, une fantate che propit sante no je. Par concuistâle (la fantate, no la muinie), le puarte a cene Agli Amici a Udin, dulà che a cjatin ancje Dario Zampa, cussì Bepi al fâs une biele figure parcè che al pues fâ viodi di cognossi cualchidun di impuartant (bielissime incuadrature de Ledre, parcè che un pocje di aghe si scuen fâle viodi).
Dopo, Bepi al conte ae fantate dal so amôr di zoventût. E ancje li al è dut un fevelâ e fevelâ e fevelâ cence contâ nuie (bielissime incuadrature dulà che si viôt il parc dal Cormôr, parcè che al mancjave un pôc di vert).
Ae fin dal film, Bepi al tache a scrivi il libri, e intant si discuvierç che ducj chescj inteletuâi che no fasevin altri che fevelâ di nuie di matine a sere a jerin naturalmentri triestins.
Cuant che al è jessût tai cines, “La grande cjacarade” al à vût une vore di buinis critichis e Lignanin al à ringraciât lis sôs fonts di ispirazion: Jacum dai zeis, Sdrindule, Frizzi, Comini, Tonazzi e Unabomber.
Il film al à plasût une vore ancje a Oscar (un gno barbe lontan). ❚
✒ di Bete di Spere