AI 32 DI MAI. Cuant che il furlan nol è plui tant DOC

Il frico, il mus, i cjarsons, la brovade, la ocje e il Montâs: al rive Friuli Doc, e i protagoniscj a saran come simpri ducj i prodots “tipics furlans”.
E lis abitudinis, lis tradizions? Si podie fâ une graduatorie dai mûts di fâ e di pensâ “tipics furlans”? E se sì, lis tradizions “tipichis furlanis” sono simpri chês o si evolvino vie pai agns?
Il furlan, si sa, al è tacât a lis sôs usancis e nol va tant daûr a lis modis, ma ancje lis usancis, par une reson o par chê altre, no restin simpri compagnis: a van sù e jù, come lis cjançons in une classifiche.
Al va simpri plui jù, par esempli, il spritz “normâl”, chel che par noaltris in Friûl al è il “spritz e vonde”. Vignût dongje in ponte di pîts, come une robe gnove, cumò il “spritz cul aperol” al è rivât fin parsore de classifiche dai aperitîfs e al è deventât plui “tipic furlan” dal “spritz e vonde”, tal sens che tu lu viodis sui taulins dai bars une vore plui di chel tradizionâl. Al sarà il marketing, al sarà che ogni biel bal al stufe, o forsit al sarà che al è plui bon e vonde (ma no ducj i furlans a son bogns di ametilu), ma al va cussì. Cuissà se ca di cualchi an cualchi marcje di alcolics nus frearà ancje “l’un par doi”.
Ancje lis abitudinis di leture no restin simpri compagnis. Di cuant che d’Istât il Stadi Friuli si jemple di conciertons come chei dai Coldplay, di Vasco Rossi, dai AC/DC o dai Bon Jovi, tal Messaggero Veneto lis pagjinis dai “events” a àn definitivementri superât, ta la classifiche da lis pagjinis plui letis, la famose pagjine dai “muarts”. Miôr feveâ dai vîfs, a pensaran i furlans (ancje se su Vasco Rossi mi reste cualchi dubit: nol staraial miôr ta chê altre pagjine, aromai?).
Fevelant di spetacui, e duncje dal Udin, ce isial di plui “tipic furlan” (oltri che sberlâ “Sghiribicilu!”) di rabiâsi cun Pozzo parcè che nol spint bêçs par meti dongje une scuadre di sest? Ma ancje chê e je une robe che cul timp e je un pôc gambiade. Cumò, il furlan nol domande plui a Pozzo di tirâ fûr lis mans de sachete par comprâ zuiadôrs, ma di fâlu pai zuiadôrs e ancje par tirâ sù il stadi gnûf.
Insomit: va ben lis tradizions, ma il Friûl nol reste simpri li, tacât a lis stessis robis, e a planc a planc al evolf intun mût o ta chel altri.
Ce che e reste simpri compagne e je la ploie. Cuissà se e vignarà a cjatânus ancje chest an a Friuli Doc. In font, cui ise plui “tipiche furlane” di jê?
BETE DI SPERE