AI 32 DI MAI. Abonaments

Lis vês viodudis – no mo? – chês dôs pagjinis tal mieç dal gjornâl dulà che si fâs la publicitât dai abonaments al stes gjornâl? Insome: al ven dongje il Nadâl e al è timp di regâi e bisugne jessi plui bogns, ancje cu La Patrie dal Friûl.
Dut câs, savint ben che i furlans no son gnognos, e no si fasin intortolâ des publicitâts (no par nuie o soi vignude fin a Rome par fâ la publicitarie), o ai pensât che forsit al sarès miôr cirî di convincius cun argoments plui razionâi, vâl a dî plui furlans. Ve chi alore, dîs buinis resons par abonâsi a La Patrie.
1. Ducj i furlans si lamentin simpri che nissun gjornâl al fevele dal Friûl. Ma nissun bon furlan si lamente dibant, prime al cîr simpri une soluzion. E cumò le à cjatade.
2. E je dure, in dì di vuê, cjatâ un gjornâl che ti disi la veretât. Nissun probleme: par furlan no si puedin dî bausiis.
3. I colaboradôrs a son ducj int in gjambe, inteligjents, zovins, interessants, promessis dal gjornalisim, fintremai bielissims. No par nuie e colabore ancje Bete di Spere.
4. A cui che si abone, il gjornâl i rive a cjase. Mancul timp butât vie par lâ in edicule, plui timp par lavorâ.
5. Vêso presint chei articui che a fevelin tant e no disin nuie? Chei che cuant che o sês rivâts insom no vês ancjemò capît ce che il gjornalist al veve di dî? Secont voaltris, isal pussibil alc dal gjenar intune riviste furlane? Nol covente che us rispuindi.
6. Cuntune piçule zonte, cul abonament si podin cjoli ancje bielissims libris, come par esempli «I Gnognosaurs» di Dree Venier (no sai se lu savês, ma e je une fantate pardabon brave che e da  une man a Dree par scrivi lis storiis dai Gnognosaurs: si clame Bete di Spere).
7. Su la Patrie si cjatin simpri intervistis bielononis, che a tornin simpri ben: un furlan no si intrighe mai tai afârs di chei altris, e nol domande nuie. Mancul mâl che e pense La Patrie a fâ lis domandis par lui!
8. Forsit a esistin altris gjornâi che a fevelin come che a mangjin, ma dome chest al mangje polente e frico.
9. Se propite propite il numar che us è rivât no us è plasût, un pocje di cjarte in cjase e covente simpri: cuant che o varês di piturâ cjase (e un vêr furlan nol clame mai i pitôrs, al fâs simpri di bessôl), ve li che la Patrie e devente un bielissim cjapielut di cjarte!
Cemût? E mancje la rason numar dîs? Lu sai, ma no volevi jessi masse braurose. Però, in fonts, al è clâr come il soreli: ce mût si fasie a no abonâsi a un gjornâl dulà che e scrîf Bete di Spere?
Bete di Spere