Âfs e mîl: il gnûf progjet dal ort botanic di Udin

L’ort, cetant cjâr ai furlans che lu coltivin di simpri, si fâs materie continue di studis, ricercjis, tiere di progjets. L’ort botanic furlan, in vie Urbanis a Udin, al è tal stes timp un ort didatic, sientific e un lûc vert e privilegjât. Nassût a partî dai prins agns dal secul passât, al à vût tal timp cetancj intervents di recupar, come tal 2012, e al reste – par fortune, in timps cussì metropolizâts – un pont di riferiment pe conservazion de flore furlane, e lûc di ativitâts divulgativis e didatichis pes scuelis e pes universitâts. Si slungje tra i istitûts scolastics dal Malignani, Marinelli e Zanon e al à une superficie di 8 mil metris cuadris. Al ospite sidreris, magazens, areis di coltivazion, in plui che uficis e une biblioteche ben furnide.
Ogni an A vegnin moltiplicADIS PLUI DI 1000 speciis vegjetâls che a rivin dai orts botanics di dut il mont. Su cheste biele realtât e je stade fate une cunvigne, ai 9 di Jugn, inte sede de Provincie di Udin ae presince dal President Pietro Fontanini, cun esperts e delegâts dal ort e docents universitaris, tant che Marco Quai, Michele Fabro, Valentino Casolo, Daniela Novel, Francesco Boscutti, Luca Poggetti e Pietro Zandigiacomo.
A sostignî cun gnûfs progjets cheste oasi verde, plene di ricjecis naturâls raris e preziosis, e je simpri la Provincie di Udin che e à donât un altri assegn di ricercje ae Universitât di Udin che e lavore in colaborazion cul ort botanic di vie Urbanis, par miorâ la cundizion des âfs e par favorî la produzion de mîl midiant de selezion e de cure di speciis vegjetâls autoctonis.
Pecjât che la salût e il patrimoni des âFs in Regjon no son par nuie buinis, par vie di malatiis, parasits e la simpri plui scjarse disponibilitât di un habitat par lôr ideâl.
Si studiaran ancje grups di âfs dumiestiis, indulà che e je stade potenziade la presince di speciis “melifaris”. Une otime iniziative che e avanze su diviersis situazions e che si spere che e dedi risultâts bogns e numerôs, come lis presincis e lis ativitâts che l’ort al conte ogni an. 3000 students impegnâts in laboratoris, une otantine di tirocinis e diviersis tesis di lauree in materie di botaniche furlane.
✒ Alessio Screm