TV FRIÛL E CJANÇONS. Festivalfrascje

Istât: timp di mâr, di vacancis, e soredut di “cjançons dal Istât”. Chês che la prime volte che tu lis sintis tu disis “biele, cheste!”, la tierce volte tu disis: “Ah, cheste le cognòs!”, dopo dusinte e trê voltis tu disis: “Simpri chê? Vonde!”.
Fin a cualchi an fa, al jere un program che al celebrave propit chês cjançons li: il Festivalbar. E dal moment che ai furlans ur plâs recuperâ lis tradizions, specialmentri lis tradizions che a àn dentri la peraule “bar”, chest Istât la television furlane e rilance il Festivalbar, anzit: la Festivalfrascje.
Se nissun al veve capît parcè che il Festivalbar si clamàs cussì, cu la Festivalfrascje, finalmentri al è dut clâr: i cjantants a ziraran par dutis lis frascjis dal Friûl a fâ sintî lis lôr cjançons a ducj.
Par jentrâ a viodi il spetacul nol covente il biliet: baste lassâ jù la patente (che dopo al è miôr no vuidâ), e invezit de machinete o dai fulminants, te Festivalfrascje il public al tire sù in alt i tais.
Come al Festivalbar, ancje la Festivalfrascje e je la ocasion par consegnâ ai artiscj i plui grancj ricognossiments pes venditis, come il disc di aur, il disc di platin, il disc di modon (il modon al è simpri la robe plui preziose, par un furlan) e il prestigjôs disc di frico.
Ma rispiet al Festivalbar al è un grant miorament: cualchidun vevial clâr cemût che e faseve une cjançon a vinci te trasmission taliane? Di cjase no si votave, de place nancje. Une cjançon e vinceve e nissun al rivave a capî parcè che e veve vint.
Ma te Festivalfrascje al è dut plui facil: se a cualchidun i plâs une cjançon, i ofrìs di bevi al cjantant. Cussì il festival al devente ancje une prove di abilitât: cui che al vinç nol à dome di vê une biele cjançon che e plasi al public, ma al à ancje di rivâ a cjantâ cuant che al è cjoc! Parcè che ancje di Istât, e ancje se al è un cjantant, un furlan no si tire mai indaûr devant dai siei dovês, e la regule e je clare: al Festivalfrascje no si pues bevi in playback. ■
Bete di Spere