IL FRIÛL FÛR DAL FRIÛL. Arrigo Collavino al è lât sul plan plui alt

Par un om che al à passat la sô vite a tirâ sù mûrs, palaçs, dighis e gratecîi, rivâ sul plan plui alt, là sù dulà che dut si viôt e dut al è dongje nol à di vêi fat pôre. Arrigo Collavino al è muart a 86 agns a Windsor citât dal Ontario in Canadà. La brute notizie e je rivade in pocjis oris di ca dal Ocean, strenzint intun unic corot la int che e vîf sui doi grancj flums de sô vite: il Tiliment e il Detroit.
Imediadis lis reazions dal sô paîs, la biele Muris sot de Mont di Ruvigne, dulà che Arrigo i tignive a tornâ par ricurdâ la sô infanzie, la sô famee, i siei amîs. La stampe locâl e à dât grande rilevancea cheste pierdite, descrivint la vite e lis oparis di chel om partît cun so fradi Mario tal 1951 pal Nord Americhe, che cun capacitât e inzegn al à puartât la sô dite di costruzions tra lis plui famosis dal Canadà, dai Usa e no dome: ultin al è l’impuartant lavôr pal dopleâ il Cjanâl di Panama.
Ai onôrs des cronachis i Collavino a son rivâts cuant che – cjale ancje la Patrie dal Friûl di Avost 2009 – la lôr “Collavino Construction Company” e à vinçût l’apalt par tirâ sù i 104 plans de “Freedom Tower” la gnove braurose tor de libertât che e sta nassint tal puest des “Twin Towers” di New York. Tal mês di Lui il lavôrs di costruzions dal grês a son rivâts sul cuviertt e i lavors dai internis e de façade di veri a varessin di finî tal Autun dal 2013 cuant che daûr de la promesse dai Collavino sul penon e varès di jessi metude la bandiere de Patrie, tornant a cjapâ la biele tradizion furlane di celebrâ la fin dai lavors e il licôf de proprie cjase cuntune frascje sistemade in bande al camin.
O sin sigûrs che dal alt, Arrigo Collavino al slungjarà la sô man par sistemâ il grant toc di tele blu cu la acuile patriarcjine e ta chel moment la piçule Muris e la grande New York a saran leadis plui che mai di une sflandorose idee di libertât.
Mandi Arrigo! ■
DANIELE MARTINA