Loris Tramontin al spieghe la sô strategjie pe promozion teritoriâl
“La ufierte turistiche? E larès integrade plui che si pues”: Tramontin, di operatôr dal setôr, al resone in tiermins di marketing e al cjate ancjemò pôc complets i pachets che a vegnin proponûts a chei che nus vegnin a cjatâ. “Par gno cont bisugne vê une clare vision dal probleme: al covente puartâ la int in Friûl, in ogni maniere: e cuant che e je achì, bisugne fâji vivi la esperience plui positive che si pues”.
Voaltris o vês colaborât cun TurismoFVG ae realizazion de iniziative “Music and Live”: sconts sui albiercs par chei che a vegnin a viodi i concierts. Funzionie la idee?
Sì, TurismoFVG e à prontât un bon prodot ancje se al larès sburtât di plui sui cjanâi di comunicazion. Vuê lis prenotazions a son fatis simpri mancul des agjenziis e simpri di plui su internet: ven a stâi che al covente fâ plui propagande su la Rêt tai circuits telematics di vendite. Ma la strade e je chê juste; cuant che cualchidun nus sielç par vignî a stâ cualchi dì achì di nô, la nestre preocupazion e à di jessi che di fâlu stâ miôr che si pues, di regalâji cualchi zornade di benstâ. Fâi sperimentâ chel cjanton di bielece e di pâs a misure di om che al è il Friûl e fâji cerçâ la nestre mangjative e i nestris vins. Se un al ven, al viôt un straordinari conciert e al passe cualchi zornade cuiet, legri, passût, lustrantsi i voi e scuvierzint une Regjon simil ae Toscane, al è facil che al torni e che al spandi atôr cul peteç une buine peraule par indreçâ cualchi so amì o parint alì di nô.
Ma ise in Friûl la predisposizion a resonâ in maniere integrade o ognidun tirial l’aghe al so mulin?
O capìs che cheste Regjon no je masse unide ma al è stupit fâsi la vuere e no resonâ come sisteme. Lis tantis polemichis su Springsteen che al dîs “Mandi Triest” a son la spie di ce che o stoi disint. In ogni câs, il probleme al è sì chel dai cjampanilis e des corporazions, ma a son ancje altris situazions di debolece che si varès di frontâ par gno cont par rivâ a costruî un setôr turistic competitîf.
Ven a stâi?
Nus covente une ufierte ricetive plui complete e cualificade. O cîr di jessi clâr: a viodi che Madonna e duar a Vignesie, daspò jessisi esibide a Udin, di imprenditôr no mi interesse, ma di furlan un pôc mi susti, parcè che al vûl dî che no je nissune struture di cussì alt nivel di rivâ a dâ acet ai turiscj di fasse une vore alte. Di fat o vin dome doi albiercs a cinc stelis in Regjon, un a Lignan e un a Triest. E i turiscj siôrs che a puedin spindi a son une fasse di marcjât che no si pues fâ di mancul, soredut intun moment di crisi.
Coventaressial un “brand” ae nestre Regjon par vendisi miôr?
Prin dal “brand” a vegnin lis ideis. Ma intal mont de comunicazion bisugne vê un sproc sintetic. “Ospiti di gente unica” al veve alc di bon, “Tipicamente friulano” al di là dal Tiliment nol funzione. Dut câs e covente une idee fuarte: “Music and live”, par esempli, al è un progjet ae avanguardie che al pee musiche e teritori e Vendola nus al à subit copiât cul so Puglia Sound. Parcè che lis ideis, se a son buinis, a son cence confins. E lis capissin pardut. ■
Walter Tomada
