CULTURE – Lis “Gnovis” daûr a tornâ

Anna Casasola: intant,compliments. Jê e je une des pocjis gjornalistis che, a Rome, a àn decidût di sostignî l’esam professionâl in marilenghe.
«Par dî il vêr, lu ai fat dome par une part, dome te scriture dal articul. O ai tratât il câs de cjantant Madonna e des sôs adozions dai fruts dal Malawi. Po l’orâl lu ai fat par talian. Par me al è stât un fat normâl, o disarès une scomesse. Ma no ai volût che al fos considerât une facilitazion o une furbetât par passâ l’esam. Si trate di une pussibilitât de leç, cjapade buine ancje di altris minorancis. Viodût che o vignivi de esperience des “Gnovis” e che la lenghe furlane mi plâs, le ai sfrutade».
Apont, lis “Gnovis”. Cuant tornarano a scomençâ?
«E je daûr a rivâ insom la burocrazie de convenzion jenfri Provincie e Telefriuli. In Fevrâr o varessin di tornâ a partî. O larìn indevant fintremai a Dicembar dal 2009».
Cemût isal gambiât il formât?
«O larìn in onde cun chel stes formât sperimentât di Setembar a Dicembar dal 2008. O vevin scomençât cuntun altri: cul progjet sierât tal 2007, “Lis Gnovis” a duravin 5 minûts, juste il timp di dâ lis notiziis. No bastavin. Alore o vin pensât di struturâlu plui “a scandai”, tematic e plui lunc, fintremai a 10 minûts. L’obietîf de Provincie al è chel di dâi dignitât ae lenghe, che e pues jessi doprade in cualsisei cjamp e contest, ancje gjornalistic».
Dacuardi, ma al è simpri un imprest tes mans di un ent public, gjestît di une zonte, espression di fuarcis politichis. No lu cjatial limitant pe libertât di informazion?
«Al pues jessi limitant, ma bisugne tignî cont che al è une rispueste de provincie a une robe, a une esigjence, domandade dai stes furlans.
E che e varès di jessi scoltade di cualchidun altri, par esempli de Rai».
Mai tirade pe gjachete?
«O ai simpri lavorât in autonomie, in mût trasversâl, ancje cu la oposizion. Nissun mi à mai imponût di sintî lis “nomenclaturis”.
Cun chest gnûf formât chest al sarà ancjemò plui vêr. O larìn sul puest, o fasarìn viodi atualitât, tradizions e culture».
Pussibil che nancje Fontanini i vedi mai domandât une interviste confezionade?
«Nol vûl jessi intervistât. Al è stât ospit in studi dome trê viaçs: une volte par vie che lu ai “ricatât”, une altre pe inaugurazion e ae fin pai augûrs di Nadâl. Vuelial savê ce che mi à dit cuant che o vin tornât
a scomençâ?».
Ce i aial dit?
«Di no stâ a scoltâ i trombons, ma la int. E di fat, la Casasola in chei cuatri mês dal 2008 si è becade dôs bronchitis, une a Paulâr e une fasint il paiaç tal ospedâl di Udin».
OSCAR PUNTEL