LA FABRICHE DAI… LIBRIS. Erotisim e ironie di Francesca Gregoricchio

Di sigûr un libri di contis erotichis, scrit di une femine, par furlan, al pues jessi une robe une vore intrigose e no dome pal panorame editoriâl locâl. O stin fevelant di “Ses & barete” di Francesca Gregoricchio, a pene vignût fûr pe cjase editore KappaVu.
Si trate di un librut di vincj contis curtis dulà che la umanitât a ven viodude doprant une prospetive particolâr, di simpri presinte e fondamentâl te vite di ognidun ma che par secui e je stade tignude platade e vissute in maniere frustrade, ven a stai il ses.
Par frontâ cheste opare la autore e à fat une schirie di sieltis interessantis. Par scomençâ chê de conte curte che si palese come une forme ideâl par l’obietîf dal libri. Ogni storie e finìs cul jessi une pinelade di un cuadri unitari, esplorant un dai diviers aspiets dal rapuart de umanitât cu la sessualitât, passant dal plasê aes pôris, de tenarece aes frustrazions.
Un altri probleme frontât al è stât chel de sielte dal regjistri linguistic di doprâ. La Gregoricchio e dîs te prefazion di vê doprât il furlan «parcè che e je une lenghe ancje di tiere e di sanc», dut câs la scriture, te sô aparente semplicitât, e je une vore fine, elegante e soredut misurade, dulà che ancje lis realtâts plui picantis e lis descrizions plui crudis, che no mancjin, no deventin mai triviâls.
Il mieç doprât par tignî adun il dut al è chel de ironie, «mi plâs mateâ cu la idiozie dal gjenar uman» e zonte la autore. E je une version moderne di chê ironie popolane furlane, disincjantade e sclete, che, spes filtrade di mentalitâts repressivis, no simpri e je rivade a espression leterarie.
Il dut al è saurît, in maniere implicite, di un pont di viste feminin, che al dâ une vision dal dut particolâr al rapuart ses-podê, o se si vûl ses-predominance, cussì presint te nestre societât.
No sin plui tal opressîf sîscent des poesiis erotichis clandestinis di Eusebi Stella, o vin ancje za patît la trasformazion antropologjiche pasoliniane sucessive ae disparide de societât contadine de sô “trilogia della vita”. Al è restât un mont disorientât cuntune umanitât stranide e “avonde fûr di gamele” dulà che il concet di normalitât, se al esist, nol è facil di determinâ.
In sumis a somein dome des contis scabrosis, scritis di une femine, par furlan, ma a son un alc di plui intrigôs. ■
Maurizio Biasizzo