MUSICHE. Festival de cjançon furlane

Tal numar passât, la nestre Bete di Spere nus veve contât di un Sanremo in version furlane, il “Festival di Sant Denêl”, dulà che tal puest di paveutis si viodevin dome acuilis. Noaltris invezit us fevelìn dal “Festival de cjançon furlane 2012”, chel vêr, che si davuelzarà ai 29 di Setembar tal Teatri Giovanni da Udine. Il presentadôr al è simpri Dario Zampa, ancje se nol sarà compagnât des dôs valetis (une di ca, e une di là da la aghe…), ma de FVG Mitteleuropa Orchestra e de East Cargo Band. Daspò di un timp lunc di cidinôr, dal 2010, e dopo passe 50 agns de prime edizion, il festival si è riproponût tant che apontament pe musiche in marilenghe, dongje dal Premi Friûl, di Suns e dal Liet International. «Il Festival dal 2010 al è stât un grant event», al a ricuardât il diretôr artistic Valter Sivilotti, «un moment cetant impuartant pal disvilup e pe divulgazion de cjançon in lenghe furlane te nestre regjon». Il festival al jere nassût a Pradaman tal 1959, inmaneât de Scuele Libare furlane cul jutori di esperts de lenghe e des tradizions dal Friûl, tant che don Domenico Zanier, Tarcisio Todero e Mario Argante. Tai agns Setante a partecipavin ancje artiscj come Enzo Tortora, Enrico Montesano, Gino Bramieri, Wilma De Angelis, Cochi e Renato e tancj altris. Vuê il Festival al è inmò in vite in gracie dal impegn dal Aster cultura-Noi cultura (cun Manzan prin comun dal progjet), cul sostegn de Regjon e de Provincie di Udine, de BCC di Manzan e de Fondazion Crup, e cu la colaborazion de ARLeF. «Il progjet», al va indenant Sivilotti, «cuntune serie di laboratoris e concierts, al a stimolât il confront fra emergjents e cjantautôrs  storics de nestre tiere, dant la pussibilitât ancje ai zovins di misurâsi in chest repertori, sfrancjant lis propriis abilitâts». Tal 2010 e veve vinçût Megan Stefanutti, zovine cjantante di Colorêt di Montalban, cul toc “I vues di Diu”, scrit di Aldo Giavitto. Par chest an si pues inviâ un toc inedit, di massim 5 minûts, dentri dai 31 di Mai. In pali a son 3mil euros pe prime cjançon classificade, 2mil pe seconde e mil pe tierce. Al mancje pôc! Fracait www.festivaldellacanzonefriulana.it  ■
Natascia Gargano