TERITORI – Midune no torne in Patrie!

Il referendum che si è davuelt a Midune, ai prins di Dicembar, pal passaç di regjon, nol è lât cemût che si spietave il comitât promotôr. Ma Marica Fantuz – la presidente – no si bute jù e e sledrose lis maniis par frontâ, se la int e volarà, un gnûf tentatîf fra 5 agns. La zovine “passionarie” nus conte il so pensîr in mert al risultât.
Daspò il grant lavôr fat si spietavie un verdet difarent?
No pues dineâ di sei restade mâl par no vê otignût il quorum che al coventave, ma no sei dal dut avilide. A l prin colp al pues someâ che i midunês no vedin volût cambiâ regjon ma se o considerìn che il 25% dai residents intal forest – 600 di lôr – no saressin mai tornâts e che a Midune,  par solit, lis consultazions a tirin dongje no plui di 1700 personis, i 1023 che a àn votât “SI” a son ben plui dal 50%.
Cualis sono lis motivazions che a àn decretât un risultât negatîf?
Dal sigûr i residents tal forest e il brut timp. O zonti ancje la triste informazion fate di chei che a rispuindin ae politiche e no a la int.
E cumò ce fasaraial il comitât? Si fasaraial un gnûf referendum?
Il comitât al larà indenant pe sô strade e se i midunês a volaran tornâ a provâ di ca a 5 agns (timp proviodût de leç), jo o sarai cun lôr ad in plen.
Cemût àno rispuindût i ambients de politiche venite e furlane?
I politics che o soi in contat, mi son stâts dongje, ancje daspò il referendum. Ancje Galan che, fin chel dì des votazions si jere compuartât in maniere secont me masse autoritarie e arogant, al à sbassât i tons, cjapant at de volontât popolâr.
Ce si sintie di dî ai siei paisans?
O ringrazii ducj chei – e a son cetancj! – che fin cumò a àn crodût tal nestri lavôr e che nus àn dade poie e credince. O ringrazii propit ducj!
Midune e à vude la pussibilitât di decidi cuintri la politiche… o ai viodût discussions, scambi di ideis, leams, robis mai viodudis prime e cheste e je bielzà une vitorie.
Sandri Olivetto