TERITORI – Tavan o “il destin de un om”

Sodisfazion a Pordenon pe gnove rivade di Rome, dulà che il Guvier talian al à decidût, a Dicembar, di concedi al poete di Andreis Federico Tavan i beneficis de leç Bacchelli pai siei merits leteraris. Propit il conseîr regjonâl di Cjasarse Piero Colussi, dal grup Cittadini-Italia dei Valori, al veve sensibilizât cuntune mozion il Consei regjonâl sul probleme di Tavan, malât di tant timp. “Federico Tavan al è une des espressions plui grandis de culture dal Friûl Vignesie Julie – al à rimarcât Colussi –. Chest poete al à scrit viers splendits, ardints e ribei, amâts ancje fûr de Italie”. Il Consei regjonâl a al à fat sô la mozion ae unanimitât, e le à fate vê al sotsegretari de Presidence dal Consei dai ministris Gianni Letta. La leç Bachelli e garantìs un assegn par dute la vite par chei artiscj e par chei sportîfs innomenâts che a vivin in puaretât. Sodisfat ancje il Comun di Pordenon, tra i promotôrs plui atîfs di cheste assegnazion bielzà dal 2007. Propit la Aministrazion comunâl naoniane e veve organizade une mostre tal mês di Setembar dal 2008: une rassegne fotografiche di Tavan, curade dal fotograf furlan Danilo De Marco e intitulade “Nostra preziosa eresia”. Fotos in blanc e neri, scatadis tra il 1994 e il 2008: dentri, dute la fisicitât de poesie di Tavan, cu la sô muse che si slargje e che si strenç in bocjatis e in lengatis, plenis di vite. “Tavan al è il fotograf di se stes – al à contat De Marco –: jo o ai dome podût meti lis mans, cualchi volte, sul gno copyright, parcè che lui al è cussì brâf te sô auto rapresentazion”. Une poesie fisiche, chê di Tavan: viers che a fevelin di une nâf spaziâl, de pôre, di Andreis, de sô vite ator pal mont. Lis sôs operis a son stadis puartadis a teatri di Marco Paolini, e a àn fat il zîr de Europe. Ma cence dismenteâ il so paîs, e lis sôs storiis di striis e di cjasis vecjis. E soredut la lenghe andreane, un furlan cun tantis influencis ladinis e venetis, une lenghe antighe ma tal stes timp vive tes poesiis di Federico. Come in cheste.
Davide Francescutti