Sfuei Mensîl Furlan Indipendent
Archivi de Patrie

TV FRIÛL E CJANÇONS. Sant Denêl, il festival de cjançon furlane

............

Vonde fevelâ dome di Sanremo: a esistin sants bogns di fâ spetacul ancje di chê altre bande dal nord Italie. E par dimostrâlu, ve chi il Festival di Sant Denêl: la kermesse plui famose de cjançon furlane.
A San Remo a doprin lis rosis, simbul de citât, par furnî il palc di sene? Benon: a Sant Denêl invezit si doprin i persuts! A saran ancje mancul colorâts (miôr cussì, che se no al è dut un carnevâl, e il furlan al à miôr jessi plui seriôs), ma a fasin un bon profum distès, e dopo trê dîs no son di butâ vie, anzit: a son plui stagjonâts e a valin di plui.
Al festival di Sant Denêl lis cjançons no fevelin di amôr, ma naturalmentri di fadie: la rime preferide e je “tratôr/lavôr”.
Ve chi lis favoridis di cheste edizion:
– “Graciis da lis rosis, ma o vevi miôr un salam”, di Nilla Merlets.
– “Al plûf (finalmentri no ai di bagnâ l’ort)”, di Meni Modugn.
– “Cui che nol lavore nol fâs l’amôr. E soredut, nol met vie bêçs”, dal Fantat di viâl Vignesie.
– “No ai la etât par lavorâ (ma par intant o doi une man in cjase)”, di Gigliola Cipe.
-“Tiliments di peraulis”, dai Jalisse.
Grande la spiete pal monolic dal ospit: la babe dal paîs. E fevele par oris cence dî nuie di sens, propite come Celentano, ma almancul e fevele a gratis, cussì si sparagne.
Ator dal presentadôr, Dario Zampa, si viodin dôs valetis: une bionde e une more? No: une di ca e une di là da la aghe. Smentide la presince di une valete foreste: tal ultin moment si è tirade indaûr disint “no se pol”.
Come di tradizion, a la fin di dutis lis pontadis al larà in onde il dopofestival, diretementri dal bar de place, cun ducj i peteçs su cjantants, presentadôrs e valetis (ancje chi, la babe dal paîs e presentarà cence domandâ un franc).
L’argoment principâl dai peteçs di chest an al sarà dal sigûr il tatuaç di une des dôs valetis. Eh, sì: ancje tal argoment “piel distaponade”, il Festival di Sant Denêl no nol è di mancul di chel di Sanremo, anzit. Parcè limitâsi a mostrâ une paveute, cuant che si pues viodi une biele acuile dal Friûl? ■
BETE DI SPERE

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +