ENTS LOCÂI. Democrazie di incressi te tradizion dal Patriarcjât

«La riduzion dal numar dai rapresentants di guvier e sarès valide se pensade in tiermins di un personâl politic plui preparât e di cualitât». Bertoli al fevele in tiermins sclets: «Di un pieç o sin rivâts a un paradòs de democrazie: ducj a puedin governâ ancje cence savê nuie. Lassant spazi cussì ae tecnocrazie… ».
In ce maniere si varessial di selezionâ alore la gnove classe dirigjente in Friûl?
«Cuntun sisteme di guvier difarent. Dongje di une piçule assemblee regjonâl di saçs, la rapresentance des autonomiis e sarès dade di une seconde cjamare, fate di conseîrs cence retribuzion parcé che formade dai rapresentants dai podês locâi. O varessin doi vantaçs: no si doprarès plui lis autonomiis locâls come trampolin pe cariere politiche e la competence madressude te aministrazions dai Comuns e insiorarès la legjislazion su chescj temis».
I tais no son mai avonde, dut câs: «Il numar dai membris di zontis e conseis – al spieghe Bertoli – al va ridot al essenziâl e al va fissât un limit aes indenitâts. Come che al diseve Titta Metus, conseîr regjonâl Dc, i Comuns a vevin di restâ i terminâi democratics lizêrs di une riorganizazion dal guvier locâl par frontâ urbanistiche, edilizie, cumierç, servizis sociâi, racuelte e valorizazion des scovacis». In dut chest, “il vêr furlan nol puès no pratindi de publiche aministrazion un miorament de trasparence ma chest al è possibil dome cuant che si rive a une semplificazion legjislative che e permet a ogni citadin di inacuarzisi di ats no corets di bande di politics o dipendents publics». Cumò «lis leçs a son masse e al vâl ce che al diseve Giolitti: “pai nemis lis normis si aplichin e pai amis si interpretin”. Taiâ si puès: ancje se covente dî clâr che la complessitât de leç e va daûr de complessitât de societât.
In Friûl e à di vê un valôr fondamentâl ancje la meritocrazie, soredut tal setôr public. E un sisteme par incentivâle al sarès. Lis Universitâts de Regjon a scugnin jessi associadis ae selezion, formazion, inzornament, valutazion dai standard dal personal de aministrazion a ducj i nivei. Dome cussì la burocrazie e po jessi un motôr e no un fren al disvilup».
Lavorâ ben e tignî un rapuart plui sclet e diret cui citadins al è plui facil se si doprin i mieçs che vuê la tecnologjie e met a disposizion. «La aplicazion des inovazions che a vegnin de eletroniche e de informatiche e zove. Lis impresis, lis universitâts e i parcs di ricercje a varessin di prontâ soluzions che se a funzionin a podaressin jessi vindudis ancje tal forest».
La tutele des lenghis di minorance, de identitât furlane e de component plurilengâl di chescj teritoris e à dut câs di jessi une des fondis permanentis de nestre gnove specialitât. La difese des feveladis e pues jessi declinade in maniere di mudâ la Patrie intun laboratori, intun model svuizar che al vedi inte coesion di chestis plusoris difarencis un dai elements di atrativitât plui impuartants, parcè che a zontin la dimension culturâl a chê istituzionâl. Cheste e je la vere ereditât dal Patriarcjât di Aquilee che o vèn di sfuarçâsi a tignî vive, ancje cirint di tutelâ miôr che o podìn chest sît che al è il vêr simbul storic de nestre divignince”. ■
Walter Tomada