MEDITANTLIS TAL SO CÛR. Brutis realtâts

In chescj moments li che il gnûf guvier al à un andament plui che mai centralizât, si à la sensazion che la peraule “federalisim” no esisti plui e che la specificitât di une Regjon autonome e vegni vulintîr dismenteade. E cussì, intant che o pensi a la centesime bastonade che al cjape il nestri Friûl, ancje o continui a cjalâ a ce che al sucêt dulintor di me.
Cuant che o jeri frut, lant pal bosc, si podeve cjatâ dongje di un troi un côl di brene secje, fruçonade, cuntun va e ven di furmiis: al jere un furmiâr. Nô fruts, o cjapavin un stec e o foropavin il grum provocant dut un cuarantevot fra lis furmiis.
Cheste imagjin e je la burocrazie di vuê mai vonde passude di cjartis, di firmis e di documents; e aumentarà e e coparà i piçui; nus ridusarà a un grant furmiâr confusionât cun pendence a psicopatologjie coletive.
Cuant che o jeri frut o vevin daûr di cjase tun sierai il gjal e un pocjis di gjalinis. Ogni tant o cjalavi il cîl e o vedevi là sù i ucielats che a ziravin in cercli e a spiavin par plombâ jù a colp sore une polece. I gjalinârs e i lôr abitants a jerin vigjilâts speciâi di besteatis che a svolavin.
Mi somee che nô o sin compagns; o vin la leç de privacy, ma i controi, di ce che si sint, a aumentaran in dut e dapardut; il stât nol à stime di nô, no nus trate di citadins, ma di nemîs simpri pronts a imbroiâ. Lis gnovis leçs nus rindaran suspietôs ancje di chel che al vîf dongje, come ai timps di Ceauşescu in Romanie. Simpri plui spes si sint a dî: “No pues cjacarâ par telefon; si viodarìn; si sintarìn a vôs.” Al aumentarà il dubi che spiis scuindudis nus tignin di voli in ce che o fasìn, ce che o palesìn, ce che o telefonìn.
Cuant che o jeri frut, in primavere si leve pai prâts a cjapâ i grîs. Si jentrave cuntun frosc inte buse e si stiçave il gri fint cuant che al saltave fûr; si lu cjapave e si lu poiave tun vasut di veri o tune latine vueite di conserve; si poneve dentri dôs fueis di lidric e si le taponave cuntun tapon sbusât par lassâ cori l’aiar; o metevi il vasut sul barcon e o spietavi che il gri al scomençàs a cjantâ te sô preson.
Chel gri o sin nô. Mi è displasût sintî a pontificâ tai discors uficiâi che cumò ancje i puars a àn di parecjâsi a fâ sacrificis. I puars, i sacrificis ju àn simpri fats; al è in alt che no ju fasin mai. O sin ancje nô tun vasut che al deventarà simpri plui stret e la monede, fra tassis e benzine, e sglinghinarà simpri di mancul; ma nus spiegaran che al è biel continuâ a cjantâ.
Il furmiâr, l’ucelat e il gri: trê imagjinis di cuant che o jeri frut… trê brutis realtâts dal moment di vuê. ■
pre Tonin Cjapielâr