CJARGNE VIVE. Fâ sgnape a Cjabie

«La sodisfazion plui grande e je chê di continuâ la tradizion che e va indevant di tantissim timp», al conte il zovin Matteo Gortani.
«A Cjabie o vin simpri vude la tradizion di distilâ, in particolâr la mê famee le à simpri tramandade tai agns. Prime si faseve cul lambic e dopo gno pari al à comprât il prin implant di distilazion. La tradizion e vûl che al sedi stât un cjapitani dal esercit de Serenissime, di stanze intune localitât slave, a puartâ il procès di distilazion a Cjabie».
Matteo al continue spiegant «Achì, di simpri e je stade considerade une mont là che la pome in gjenerâl e ven une vore di cualitât, cun tant zucar e duncje te fermentazion e prodûs une vore di alcul. A àn començât tor la fin dal 1700 e biel planc il numar des distilariis al è lât cressint (1901: 750 abitants e 12 distilariis). Tai agns ‘80 o jerin restâts dome nô, plui altris dôs distilariis cun sede achì, ma cun produzion inaltrò. Vuê o sin la uniche distilarie tal Friûl cun diviersis produzions che a van pe Cjargne, pal Friûl e cumò ancje in Venit, in Emilie Romagne, in Lombardie e a cualchi client in Toscane».
Ma no mancjin in problemis, come che nus specifiche «Lis dificoltâts a son tantis e dispès a vegnin de mentalitât che o vin nô: bisugnarès jessi un tic plui elastics e vê une invidie plui costrutive. Par lavôr, o soi lât spes in Sudtirôl e li, se un al faseve une robe biele, chel dongje, par invidie, al cirive di fâle inmò miôr. In Cjargne nol è propit cussì. Une altre dificoltât e je che la int e stente a fâ sacrificis. Jo o ai durmît par agns te sale di distilazion vecje e cumò o vin fat un implant gnûf computerizât par otimizâ i timps e par no pierdi oris di sium. Chest al à puartât a un sacrifici economic no di pôc cont».
Par sierâ, Matteo si racomande «Tocje crodi in ce che si fâs, vê obietîfs e rivâ insom; secont me, fasint grup al sarès dut plui sempliç. Invezit, o vin il brut vizi di stâ isolâts cun iniziativis che a son solitariis e chest al è il mâl de Cjargne. In altris realtâts a cirin di unîsi par ufrî di plui a la int che e ven e a cui che al sta sul teritori. Plui risorsis o vin e plui la int e pues stâ sul teritori. Il gno obietîf – al conclût Matteo – al è chel di podê lâ indevant par rispiet di chei che a son stâts prime di me.» ■
Marta Vezzi