EDITORIÂL. Rason e etichetis

Al è un pinsîr che mi baline di un pôc di timp. Al ven fûr de leture dal articul di Pre Rizieri su la Vite Catoliche a proposit di Pasolini e dal consumisim.
Il nestri autôr, su “Scritti corsari”, al tacave il mût di jessi de Glesie tai confronts di cheste gnove ideologjie, di chest “gnûf podê… un edonisim materialist e cence Diu che al sburte a produsi robis che no coventin, a consumâ e a strassâ… al cambie la nature de int, al jentre tal plui profont des cussiencis, butant vie i valôrs tradizionâi e la Glesie. Cheste gnove borghesie e à un gnûf spirt che, dant ai oms une vision totâl e uniche de vite, al jentre in competizion cun chel religjôs, salvant dome il clericalisim”.
Cussì, duncje, Pasolini dai agns ‘70 e cjalant indaûr mi somee che e sedi lade ancjemò piês.
O sin rivâts a fâ leçs par mandâ la int a lavorâ di domenie, tant che al arcivescul i tocje scuvierzisi sindacalist e preparâ il siopar des comessis.
Ma, a gno parê, chest al è dome l’aspiet plui sempliç de cuestion puestade di Pasolini che nus vise de fuarce di cheste ideologjie gnove tal cambiâ il spirt de int.
Di sigûr, fevelâ di consumisim intun moment di crisi profonde come cumò al somee un tic strani, ma propit invezit intun moment dulà che chest model di svilup al mostre dute la sô debolece, al sarès di stricâ une biele rie blancje e scomençâ dal principi. Viodi par esempli ce che al covente al Friûl vuê par jessi ancjemò Friûl e no dome une espression gjeografiche o un ricuart folcloristic.
O vûl dî, in pocjis peraulis, decidi su ce troi svilupâ ricercje e inovazion, dulà che a àn di jessi metudis stradis e feroviis, cuâi setôrs de industrie che a puedin lâ dacuardi cul ambient, e soredut meti la tiere al prin puest. Che al vûl dî no dome lavôr tai cjamps, aziendis agriculis, ma rispiet di un teritori e duncje de nature, tant che un regâl di Diu.
Cualchidun dai predis de autonomie al à scrit che nol pues jessi un Friûl che nol sedi cristian. No sai se è vere une afermazion cussì fuarte. Sigurementri, un Friûl cence valôrs di fonde nol rive a resisti plui di tant a nissun atac.
Ma i valôrs no son etichetis di tacâ di ogni bande, a son la rason stesse des sieltis che si fasin. ■
Dree Valcic