MEDITANTLIS TAL SO CÛR. O ai fat ce che o ai podût

Al è chest un titul che si podarès dâi a une prime riflession sul vescul bons. Alfredo Battisti che nus à lassâts ai prins di Zenâr di chest an.
Mi contavin che un om al jere rivât in chel altri mont e al voleve vê un incuntri personâl cul Pari eterni par vie des tremendis injutiziis che a sanganin la tiere. Ma fra chei nûi si è cjatât tune procession cence fin di int che e cirive une rispueste al misteri dal dolôr. Si è unît a lôr e pelegrinant di planete in planete une dì a àn viodude une lûs, une gaboite, une legnere, un vielonon e i àn diti: «Sâstu li che al è a stâ il Paron dal mont? Parcè che o vin di cjacarâ cun lui». E chel: «O soi jo». Alore i domandarin: «Parcè inte vite tant patî?». E lui ur ruspuindè: «O ai fat ce che o ai podût».
O pensi che cheste rispueste e vali par me, par voaltris e, al li là dai titui dai giornâi e di ciertis laudis falsis, ancje pal Vescul Battisti: “O ai fat ce che o ai podût”.
Pensant a bons. Battisti o scuen dî che al è stât il vescul de mê vite e o podarès contâ fats personâi che mi àn tocjât; a son di zontâ lis vicissitudinis di Glesie Furlane e intal grop il cartolari di Battisti cun pre Antoni Beline. O imagjini l’incuintri dai doi tal mont dal vêr: la lenghe sclete di pre Antoni e i voi mistereôs di Battisti che no tu rivavis mai a capî se ti imbroiavin o se ti volevin ben. No par ultime e je la sô conduzion pastorâl de diocesi in timps calamitôs come il taramot, te cuistion furlane e, inte glesie, fra lis imposizions di Rome.
Se o vin timp a vivi, al rivarà ancje il moment di podê cjacarâ cun serenitât di chest om che al à vivût 28 agns fra di nô.
Par cumò lu compagnìn cun tant rispiet tal misteri de muart; di fat ancje lui, come che al sucedarà di nô, al è stât glotût dal grant pes che il mosaic de basiliche di Aquilee nus rapresente e pal misteri di Crist che ducj al à salvât al è stât butât fûr sul ôr de vite eterne. Te leterature mondiâl, tai grancj autôrs di cualsiasi secul e culture, la compassion e je la virtût che sore lis vicendis dal mont e regne sovrane e chest al vâl sore di me, di voaltris e di bons. Battisti. Par chest, mi plâs viodilu come Gjone sot dal ricin e in chest misteri lu saludìn e i augurìn lûs eterne.
Ti sin dongje, bonsignor, te memorie e te preiere; tu âs corût, predicjât, scrit e patît: tu ti sês impegnât come tancj predis, o int di famee e di paîs; tu âs fat come ducj, ce che tu âs podût. Cun Gjone e cu la nestre int polse te pâs. ■
pre Tonin Cjapielâr