VIERTIDURE – Fieste grande pai Otante agns dal on. Baracêt… e cualchi critiche

La cerimonie davuelte pal inovâl di Arnalt Baracêt e à vût tal “grazie” la peraule plui pandude. Di ogni diferent cjanton, categorie economiche e suaze politiche, si son cjatâts in chel vinars ai 20 di Zenâr, par “tirâ lis orelis”, cemût che si fâs di fruts pai compleans e cemût che a àn ricuardât Lorenzo Pelizzo de Filologjiche e un trafelât Renzo Tondo, rivât a spiç: Arnaldo Baracetti al à finît 80 agns e ju à fiestezâts intune sale dal Consei di Palaç Belgrât plene di int. La batude di mans che lu salude cuant che al jentre lu ingrope un pôc. L’etât e la malatie lu compagnin suntune carocele, al cjape il puest jenfri i bancs dal parlamentut provinciâl di Palaç Belgrât a Udin. Oviementri in chei di çampe, lui che a çampe estreme al è stât une vite interie. E scomence la procession: ducj a strenzi la man. La sô ridade, contente, si sint precise, jenfri la confusion dal moment. Po, la schirie di laudis. Pieri Fontanini i ricognòs di no vê mai molât la bataie pal autonomisim e pe specialitât de Regjon. Furio Honsell: «al è in gracie a chê Universitât volude di te, che ancje jo o ai cjatât la mê Patrie». Cuntune lungje lectio, la retore Cristiana Compagno e ricuarde la leç de Ricostruzion e la nassite dal Ateneu: «Il Friûl al podeve burî fûr de sô sotanance e dai claps dal Orcolat dome cul cjâf». L’ex ministri Giorgio Santuz al conte i agns a Montecitorio, cuant che plui di une volte al blocà Andreotti dal barbîr de Cjamare par cjatâ la cuadre su lis cuvierturis finanziariis des leçs. Il president de Regjon Renzo Tondo: «Mi à dispès criticât, ma i ricognòs il rispiet, il vê savût fâ scuadre pe difese dai interès de comunitât furlane, oltri lis distinzions ideologjichis».
Discors celebratîfs che, dut câs, no son plasûts a cualchi storic esponent di Moviment Friûl. Al dîs Marco De Agostini: «I ricognòs cierts merts, ma no di jessi un ultra-trentenâl eroi des lotis pe autonomie dal Friûl, come che lu àn glorificât tant de fieste. Tes sedis istituzionâls al fo strenui, testart, potent sostignidôr di cierts dogmis dal Pci in clâf “anti-Friûl”, sustignint la “unitât regjonâl” e la “no-concorenzialitât” Friûl-Triest. Baste tornâ a lei i ats dal Consei regjonâl di chei agns par capî cemût che e je la storie verementri». ■
Oscar Puntel