CULTURE – LA FABRICHE DAI… LIBRIS. La musiche vive di une lenghe vive

Marc Stolfo al torne a fevelânus di furlan, in chest câs di une des espressions plui magjichis che une lenghe e une culture e pues fâ viodi di se: la musiche. Un gnûf lavôr inmagant scomençant dal titul: “La mê lenghe e sune il rock (e no dome chel)”. Une analisi storiche e sociâl di cemût che la nestre musiche si è trasformade in espression di esistence e di resistence. Une esplorazion aprofondide e organiche de realtât furlane metude in relazion e in comparazion cun chês che si son disvilupadis inaltrò. Il lavôr al partìs des carateristichis di fonde de lenghe furlane e de sô cundizion di lenghe “minorizade” ancjemò prime che “minoritarie” e al va daûr de evoluzion des tradizions musicâls di chenti, tra une “memorie cognossude e promovude” e une memorie “platade”, là che al samee di viodi une linie rosse cu la storie contade in “Viaggio nella notte di Aquileia” di pre Gjilbert Pressac, indulà che, partint dal bal di “Scjaraçule maraçule” al rivave a sgarfâ fin insom de nestre storie. Un mosaic che al cjape dentri Dario Zampa, fintremai il Cjançonîr di Dael e i Povolâr Ensemble, lis scjassadis dal taramot dal 1976, il punk, la new wave, l’hip hop, il ‘Premi Friûl’, ‘Usmis’ e la colade dal mûr di Berlin, e salte fûr chê che e ven clamade “gnove musiche furlane”, di Lino Straulino, Mitili FLK e Inzirli ai Arbe Garbe, Loris Vescovo, Carnicats e R-esistence in Dub.
Un lavôr di ricercje, di documentazion e di divulgazion, fat cuntune vision multidissiplinâr che e tocje ancje storie, politiche, societât, dirits linguistics, leterature e tutele des minorancis, che nol è dome di lei, ma ancje di scoltâ. Di fat, il libri al à in zonte un cd cun tocs cjantâts par furlan, par sart, par sloven, par ocitan, par todesc, par ladin e par albanês, là che a son dôs anteprimis: “Ionco di Lanfur” dai Pantan e “La Maquina Enfernala” dai Lou Seriol.
La lenghe e je vive, e la musiche dal libri di Stolfo nus al cjante clâr.
Mauro Della Schiava