MEDITANTLIS TAL SO CÛR. Tun cidinôr cuiet

La liturgjie dal timp di Nadâl e cjante: “Biel che un cidinôr cuiet al invuluçave dutis lis robis e la gnot e jere a mieç dal so cors, la tô Peraule onipotente, Signôr, e je vignude jù dal cîl, des sentis reâls”.
Al torne Nadâl: forsit un Nadâl mancul superficiâl tun mont scandalôs, mancul sunsurôs tun moment li che ducj o vin dibisugne di riflession. Jo, par me, o domandi un Nadâl incurnisât di cidin.
O pensi ai cidins dai timps di une volte cuant che te mê valade, la int e partive des borgadis cul ferâl impiât e pai trois dal bosc e rivave te glesie glaçade par lassâsi sclipî, dopo de vuere, di une peraule di amôr e di pâs. Ma chest al è un cidin romantic che mi ripuarte a la ingjenue poesie dai miei agns di frut.
Al esist ancje un cidin che al scaturìs de necessitât: o sint il suturni tasê fra lis corsiis dai ospedâi, dai istitûts di ripôs, des personis che a san ce che e je la miserie e a vivin in lûcs li che la preiere e je cence sunôr e la zornade svuarbade di ogni avignî. A son lûcs li che il dolôr ti rint mut.
Ma a florissin ancje altris cidins: il cidin di une sielte di amôr. E il pinsîr al va a une mame e a un papà che a stan spietant il lôr prin frutin e che no cjatin peraule par pandi il miracul che ur sta sucedint; il cur al cor a ducj chei, pôcs o tancj, che te gjostre vueite dal mont cun fiducie a sielzin di crodi tal ben, di tornâ a dâsi dafâ.
E il “cidinôr cuiet” de liturgjie dal nestri Nadâl?
Pal cristian l’event de incjarnazion dal Signôr al è come il misteri di une stele che e cole, o di un floc di nêf vignût jù dal cîl o di une gote di rosade te prime lûs de zornade: lûs, cjandôr e gote profumade che si poin te tiere e si misclicin cul pantan; e je la libare sielte dal amôr di un Signôr che nassint fra di nô si incjadene a la necessitât dal dolôr, de injustizie e de muart: amôr eterni e fedêl impastanât cul pecjât par riscatânus de necuizie dal mâl.
Al è forzit chest che S. Pauli al vûl dî cuant che al scrîf:
“che o vebis la pussibilitât di capî il sens de largjece, de lungjece, de altece e de profonditât, ven a stâi di cognossi l’amôr di Crist che al va plui in là di ogni altre cognossince”. (cf. Ef 3,17-19)
Ma culì tocje dome tasê e adorâ.
Al è chest lusôr che nus mene al cuiet cidinôr dal misteri cristian dal Nadâl.
pre Tonin Cjapielâr