TERITORIS – SLOVENIE. Colât il guvier Pahor, in Slovenie si va a elezions anticipadis

SFIDUCIE_Pe prime volte tai vincj agns de sô indipendence, in Slovenie si larà a votâ pal parlament prime de ore: duncje no te Sierade dal 2012 cemût che al jere previodût, ma ben za ae fin di chest an, ai 4 di Dicembar (curiositât: tal stes dì si votarà pes Parlamentârs ancje in Cravuazie). Lis elezions anticipadis a son stadis decidudis dal president de Republiche Danilo Türk dopo che, ai 21 di Setembar, il guvier dal Prin ministri Borut Pahor nol à vût la fiducie de Cjamare di Stât (Državni zbor) su la propueste di nomine di cinc gnûfs ministris. Sui 90 deputâts, 51 a àn votât cuintri e dome 36 a favôr: un esit che al à fat capî al mont politic sloven che il guvier, di almancul un an in ca in dificoltât, nol veve plui la poie de maiorance de Cjamare.
CRISI_ Dopo la vitorie dai partîts di centriçampe tes elezions dal Setembar dal 2008, al jere nassût un esecutîf cun Pahor ae vuide di une coalizion cun SD (Sociâldemocratics, li che Pahor al è il president), DeSUS (Partît democratic dai Pensionâts), LDS (Partît demoliberâl) e Zares, formazion di çampe. Tai ultins mês però la coalizion si è sfantade: prime si son slontanâts i Pensionâts, po a son jessûts fûr dal guvier i deputâts di Zares, incolpant l’esecutîf di vê cjapât decisions cence confrontâsi cui sindacâts e cu lis categoriis sociâls e di no vê mantignût lis promessis fatis in campagne eletorâl. I faliments plui grancj di Pahor a son stâts il no jessi rivât a fâ buine la gnove riforme des pensions (refudade cuntun referendum popolâr di pueste) e di no vê fat cressi avonde la economie dal paîs.
ELEZIONS_ La coalizion cun SD e LDS no veve plui i numars par rezisi in pîts, par chest il President de Republiche Türk, dopo vê scoltât ducj i grups parlamentârs (gjavant fûr il principâl partît di oposizion, il Partît Democratic-SDS di centridrete, che al incolpe Türk di vê simpri poiât Pahor), al à sielzût il prin dì util par bandî gnovis elezions, lis sestis te storie de Slovenie indipendente, lis primis anticipadis. No jessint nissune pussibilitât di dâ vite a un gnûf guvier, il President al à sielzût la zornade di domenie ai 4 di Dicembar: se il risultât al darà indicazions pluitost claris, par Nadâl la Slovenie e podarès vê za un gnûf guvier, il decim de sô storie.
CAMPAGNE ELETORÂL_ Intant, il panorame politic tal paîs nestri vicin al sta mudant di un dì a chel altri. Un dai favorîts al è Janez Janša, leader dal SDS, za Prin ministri in trê ocasions (dal 1993 al 1997, dal 2000 al 2002 e dal 2004 al 2008). Une gruesse novitât e je chê di une figure di sucès, Zoran Janković, confermât sindic di Lubiane cualchi mês indaûr cuntune largje maiorance: ai 22 di Otubar al à presentât la “Lista Zorana Jankovića-Pozitivna Slovenija” (“Liste Zoran Janković-Slovenie Positive”), grup cun ideis di centriçampe e dut câs “dal fâ”, secont la idee dal prin citadin-manager. Pal centriçampe però al tornarà a presentâsi Borut Pahor, ancje se i scandais a dan une percentuâl minime al so SD. Par jentrâ te Cjamare di Stât si scuen cjapâ almancul il 4 par cent dai vôts: e riscje ancje “Slovenija je Naša” (“La Slovenie e je Nestre”), partît dal sindic di Koper/Capodistria/Cjaudistrie Boris Popovič.
MINORANCIS_ Ancje i doi deputâts, esponents des minorancis ricognossudis, Roberto Battelli par chê taliane e Laszlo Göncz par chê ongjarese, a àn votât cuintri dal guvier Pahor. Battelli al à sì ricognossût al esecutîf di vê mantignût i finanziaments a pro de minorance taliane, ma tal stes timp di vê complicât la cuistion des cjartis di identitât bilengâls, che cumò no si podin vê se si lis domande fûr dal teritori li che la lenghe taliane e à pâr dignitât di chê slovene.
Alessio Potocco
__________________________________________
ATENZION: CJADENIS TE MACHINE FIN AI 15 DI MARÇ
Come ogni an, vie pal Invier, dai 15 di Novembar ai 15 di Març (duncje par cuatri mês), par menâ la machine in Slovenie al è l’oblic di vê simpri tal veicul lis cjadenis di nêf. Il codiç de strade al previôt che i veicui fin a 3 toneladis e mieze di pês a vedin pneumatics pal Invier cun almancul trê milimetris di batistrade su dutis e cuatri lis ruedis o ben che a vedin lis cjadenis di montâ in câs di necessitât. I mieçs di traspuart che a pesin plui di 3 toneladis e mieze a àn invezit di vê lis gomis pal Invier metudis almancul su lis ruedis motoris. La polizie, par solit pluitost rigorose, e pues sierâ un voli dome se si fasin lis stradis su la cueste adriatiche, te zone plui cjalde dal paîs, li che al nevee di râr. (A.P.)