IL FERÂL. Un Diu dai vîfs, no dai muarts

I esperts a disin che la religjon e à tacât a cjapâ pît cuant che l’om si è sistemât tun lûc stabil e li al à sistemât ancje i siei muarts. Cence volê ridusi dute la religjon a une dimension cimiteriâl, al è evident che la cuistion di fonde e reste simpri chê de muart. Se la muart e je la ultime tape e la fin di dut, o dome la ultime tape di chest mont e la fin di chest nestri mût di esisti. Tal prin câs, il nestri timp ca jù al è un segment fra un sium e chel altri, in pratiche fra un nuie e chel altri. Tal secont câs, il nestri timp al è un tocut di une linie cence cjaveç e cence fin, come Diu.
Cheste domande se fasìn ancje par nô ma soredut pai nestris muarts. Il lâ a cjatâju, il fevelâ cun lôr, il fâur une sepulture o une cuninarie o adiriture un monument al è un segnâl che nô, in cualchi maniere, o sin convints che a vivin. Par tant, o cirìn di vê contat cun lôr e di onorâju. Ma cemût si onorino i muarts? Dome tal cimitieri?
Il gno vecjo plevan di Vençon al diseve che, se si à voie di lei bausiis, si à di lâ a lei lis lapidis. Po stâi che al esagjeràs ma une ponte di veretât le veve. No si pues spiegâ altrimentri dut chest corîr di rosis veris o matis, a cjars, cuant che si sa che ai muarts no puedin zovâur e che plui di une volte a son un tentatîf ilusori par parâ jù debits reâi.
In Cjargne o vevi une femine che, a pene rivade sul plaçâl di sant Martin, e slungjave la man viers dal cimitieri come a sbrovâ une recuie. I plui perfits a disevin che i faseve segnâl al om di stâ li e di no riscjâsi a tornâ a cjase. Parcè che a vevin cavilât fin la ultime dì.
L’afiet al è simpri bon. Ma al è miôr palesâlu cuant che al pues zovâi a la persone interessade. Pa la cuâl, une preiere e vâl plui di une rose ma un at di umanitât, une cjarece, une bussade dade in vite e vâl plui che no cincuante cuintâi di rosis strucjadis sul tombâl. E une peraule sgambiade di vîfs e vâl plui di dutis lis tabaiadis fatis denant di une lastre glaçade di marmul.
E il tignî vierte la cjase, lavorade la tiere, vive la culture, sflandorose la fede al vâl plui che no dutis lis corsis tal cimitieri. Il vanzeli al dîs che “Diu nol è un Diu di muarts, ma di int vive” (Mt 22,32). Par chel, o dîs che i muarts si ju onore cuant che a son vîfs e soredut vivint. Un popul che al vîf dome tal cimitieri o dome di memoriis o dome cjalant indaûr nol onore i muarts ma ju umilie, parcè che al fâs capî in pratiche che lôr no àn lassade nissune ereditât e no son stâts bogns di tirâ sù une gjenerazion daûr di lôr e degne di lôr.
Jo o pensi ai muarts come a une mari che e met a durmî il frut. Cuant che lu à taponât ben, e distude la lûs, e lasse la puarte in sfrese e si aprofite par fâ lis voris e par parâ indenant la barache.
A proposit dal afiet ingrumât par cuant che nol covente plui, mi àn contât il câs di un vieli, muart dopo cinc agns di infermitât. Il fi, che nol veve mai vût timp di vignî a vierzii la puarte, al à telefonât di spietâ, che al voleve viodilu pe ultime volte. Ma la int e jere za denant de buse e lui nol jere inmò no rivât. “Che al spieti, siôr Santul, che al è ancjemò a Tumieç”. Ma il plevan, alçant la vuadule da la aghe sante, al à berlât: “Dentri, dentri! Si ven a viodi di vîfs e no di muarts!”. Come che al dîs il vanzeli.
Onorìn la muart cu la vite. E je la uniche maniere par no vê un cimitieri dentri e un, plui penôs, di fûr.
Cirint lis Olmis di Diu n. 3 pagj.14
PRE ANTONI BELINE