CULTURE – LA FABRICHE DAI… LIBRIS. Une tiere siore di specialitâts

Al è ce pierdisi intun miscliçot di prodots, di colôrs, di figuris e se si scomence a cjalâ ben si pues cuasi sintî i odôrs dal persut di Sant Denêl, de scuete fumade de Val Cjanâl o dai sparcs blancs di Fossalon. Te gnove mape ilustrade cui prodots tipics furlans, volude de Ersa in ocasion di Friuli doc di chest an, al ven fûr dut il bon dal Friûl.
LA IDEE_ Il so ilustradôr Luigino Peressini, che za o cognossìn par altris biei lavôrs di cheste fate (la mape Friûl di Magance, cui personaçs de mitologjie furlane, o la mape dal Friûl 1511, editadis dutis dôs de Serling soc. coop.) si è ispirât prin di dut al “Cibario dal Friûl-VJ. Atlant dai prodots de tradizion”, ancje chest editât de Ersa dulà che si cjatin cetancj plats de cusine furlane, dai monts al mâr. Ma nol è stât dificil cjatâ ispirazion ancje dome lant ator pal Friûl e viodint cemût che in ogni lûc al sedi presint un plat tipic, une specialitât preseade, un vin di ecelence.
L’assessôr regjonâl aes risorsis rurâls, agroalimentârs e forestâls Claudio Violino al à volût cussì prontâ la mape propit in ocasion de fieste plui impuartante dal Friûl, intune vetrine di impat internazionâl par promovi i nestris prodots tipics ancje in gracie di chest lavôr.
UNE GRANDE VARIETÂT_ L’intent iniziâl al jere chel di mostrâ i furlans a taule, daûr a gjoldi des pomis de lôr tiere; cussì e je nassude la idee di rapresentâ il teritori sot di un grant arbul di vît cu la int ator di une taule, come tes fameis di une volte, dulà che ducj noaltris o podìn cjatâsi par gustâ lis nestris specialitâts.
Frico, salam di ocje, formadi Montâs, trute fumade, Peta, gubane, asêt di miluç, mîl di cjastinâr, desinis di goloseçs a son prontâts sui plats dai furlans; il dut al è insuazât ator di grops di ue blancje, simbul dal nestri vin plui cognossût, il Friulano – ma par ducj al è inmò il Tocai –, ma che a son ancje simbul solâr de vite, chê vite rurâl e semplice che di secui e puarte indevant il “tipicamentri furlan”.
Par vê informazions su la mape o vênt une copie si pues contatâ l’Ersa: www.ersa.fvg.it o clamâ il numar 0432 529203.