ATUALITÂT – Un pôc plui di culture al fasarès stâ miôr ducj…

E je tornade a scomençâ scuele: tancj problemis, i puescj di vore, ma prin di dut il dirit di vê une istruzion serie che e fâsi cressi cussience identitarie e capacitât di criticâ. Stufs de disinformazion e mala fede, un grup di insegnants e à mandât ai sorestants de Regjon e di Rome une segnalazion dulà che si lamentin pe ineficacitât e lentece che inmò in dì di vuê a van indenant e no permetin di inviâ un insegnament almancul minim de culture e lenghe locâl. No à inmò cjatade atuazion la leç buride fûr de regjon che e cjacare di une sole ore a setemane, par no plui di 30 oris ad an… duncje ben lontans di ce che al coventarès par imparâ une lenghe, ma intant al sarès un inviament.
SIMPRI MANCUL BÊÇS_ Tai regolaments atuatîfs mandâts fûr a si dîs a clâr che a podaressin no jessi i bêçs par inviâ une alfabetizazion minime par furlan che a sodisfi lis domandis za fatis des fameis. I furlans a capissin la situazion grivie dulà che o sin finîts ducj ma e à di jessi la pussibilitât di cjatâ fûr lis risorsis che a coventin, come che si pues nasâ dai finanziaments bondants stanziâts di pôc par obietîfs plui limitâts. Par cuâl motîf al è cussì “intrigôs” coordenâsi cun dutis lis leç par meti in vore ancje chê sul furlan? I milions di furlans ator pal mont a dimostrin che cjacarâ la mari lenghe (che no jere il talian in chei agns) no impedìs di cjacarânt altris, tant mancul chê uficiâl, anzit, a stice il cerviel (che lu disin ancje lis ricercjis plui gnovis).
PAL AVIGNÎ_ Ducj si augurìn che la pocje voie dimostrade cui fats fin in dì di vuê e cambii, che la strade cjapade no je che juste: in regjon e àn di lavorâ par svilupâ ancje la leç 29 che a spiete dal 2007. Ancje il setôr des trasmissions radio televisivis  al è fer e lis mancjancis pe lenghe furlane a son simpri plui evidentis. No bastin però un pugn di finanziaments: al sarès necessari in prin, come par ogni lavôr, un pôc di plui amôr vêr pe proprie tiere de bande dai politics di turni elets a rapresentâ ancje il Friûl.
Tea Di Marco